نئی دہلی، 09 اپریل 2022:

نئی دہلی میں کل اڈیٹوریم میں ثقافت کے مرکزی وزیر جناب جی کشن ریڈی نے ایل کے اے گیلری میں آرٹس کی 62 ویں قومی نمائش اور ایس این اے ایوارڈ یافتہ پرفارمنس فیسٹیول کا افتتاح کیا۔ وزیر مملکت برائے ثقافت محترمہ میناکشی لیکھی نے بھی اس تقریب کو زینت بخشی۔ اس موقع پر جناب جی کشن ریڈی اور محترمہ میناکشی لیکھی نے فیلوز اور ایوارڈ یافتگان کو مبارکباد پیش کی اور 62 واں این ای اے کیٹلاگ جاری کیا اور للت کلا اکیڈمی کی نئی ویب سائٹ بھی لانچ کی۔ اس موقع پر للت کلا اکیڈمی کی چیئرمین محترمہ اوما نندوری اور دیگر معززین بھی موجود تھے۔

اس موقع پر خطاب کرتے ہوئے جناب ریڈی نے کہا کہ آرٹ کی اس قومی نمائش کا مقصد تمام منتخب شرکا اور ایوارڈ یافتگان کی صلاحیتوں کو ظاہر کرنا ہے۔ یہ دیکھ کر خوشی ہوتی ہے کہ نمائش اور مقابلے کے لیے فنکاروں کی طرف سے بہترین مظاہرہ کیا گیا ہے۔ یہ ہمارے دور کی چمک دمک اور للت کلا اکیڈمی کی جانب سے وزارت ثقافت کی حمایت سے پیش کردہ مواقع کو ظاہر کرتا ہے۔

جناب ریڈی نے مزید کہا کہ گزشتہ صدی کے دوران بھارتی آرٹ حقیقت کے خلاف مختلف قسم کے فنی رسپانس کو ظاہر کرتا ہے۔ معاصر فنکاروں کے نوجوان گروپ کے آرٹ کے موجودہ طریقوں اور رجحانات کا مقصد یہ دکھانا بھی ہے کہ وبا کے اس مشکل وقت میں بھی آرٹ کس طرح تیار ہوتا رہا ہے۔ "علم، جمالیاتی حساسیت اور نظریات کی نئی شکلوں نے آرٹ تشکیل دینے کے عمل کو نئی شکل دی ہے۔ جناب ریڈی نے مزید کہا کہ نوجوان فنکار نئے وسائل کے تجربات کر رہے ہیں اور اپنے ارد گرد کے ماحول پر ردعمل دے رہے ہیں۔

جناب ریڈی نے کہا کہ فنکاروں کے عصری طریقے مختلف وسائل اور ان کے منفرد انداز کو بروئے کار لانے سے مسلسل تیار ہو رہے ہیں۔ جناب ریڈی نے اس بات پر بھی روشنی ڈالی کہ انہیں یہ جان کر بے حد خوشی ہو رہی ہے کہ ہمارے وزیر اعظم جناب نریندر مودی کے آزادی کا امرت مہوتسو کے اس وژن کو یاد کرتے ہوئے للت کلا اکیڈمی نے جن بھاگیداری کے عنوان کے تحت وال اسٹریٹ آرٹ کو سامنے لانے کا فیصلہ کیا ہے جہاں عام لوگوں کی شرکت اس کی تشکیل میں لازمی حصہ ہے۔ جناب جی کشن ریڈی نے فنکاروں سے اپیل کی کہ وہ اپنے فن پاروں کے ذریعے بھارت کی آزادی کی جدوجہد میں حصہ ڈالنے والے فنکاروں کے آرٹ کو یاد کریں اور انھیں اجاگر کریں۔

اپنے خطاب کے دوران محترمہ میناکشی لیکھی نے تمام انعام یافتگان سے نیک خواہشات کا اظہار کیا۔ انہوں نے کہا کہ ایک فنکار دنیا کو ایک مختلف نقطہ نظر سے دیکھتا ہے اور یہ وہ تخلیقی صلاحیت ہے جو صرف ایک فنکار کے پاس ہوتی ہے۔ اس نمائش میں موجود نوادرات بھارتی فن کے روشن مستقبل کا ثبوت ہیں۔ محترمہ لیکھی نے مزید کہا کہ للت کلا اکیڈمی متنوع بھارتی فنون لطیفہ کو ایک پلیٹ فارم پر لانے کی کوشش کر رہی ہے۔ انہوں نے اس بات کی ستائش کی کہ فنکاروں کی حوصلہ افزائی کے لیے اکیڈمی نے قومی ایوارڈوں کی تعداد رواں سال سے بڑھا کر 15 سے 20 کر دی ہے۔

اکیڈمی ایوارڈ یافتگان کی نمائش کے لیے پرفارمنگ آرٹس کا فیسٹیول گیارہ دن تک جاری رہے گا جس سے سامعین کو ملک کے طول و عرض سے پرفارمنس کا ایک دلکش سلسلہ دیکھنے کو ملے گا اور موسیقی، رقص، ڈرامہ، لوک اور متعلقہ فنون اور کٹھ پتلی جیسی صنفوں کامظاہرہ ہوگا۔