نئی دہلی،02 جولائی ، 2022/ اسٹیل کے مرکزی وزیر جناب رام  چندر پرساد سنگھ نے تریپورہ میں جمعہ کو اسٹیل کی وزارت کے تحت پارلیمانی مشاورتی  کمیٹی کی صدارت کی۔ جس کا مقصد اسٹیل کے شعبے میں سرکلر معیشت سے متعلق خاکے کے موضوع پر تبادلۂ خیال کرنا تھا۔ اسٹیل اور دیہی ترقی کے وزیر جناب پھگن سنگھ کلستے بھی میٹنگ میں موجود تھے۔

کمیٹی کے چیئر مین،  اسٹیل کے وزیر جناب رام چندر پرساد سنگھ نے کانکنی ، اسٹیل کی مصنوعات تیار کرنے اور آخری بار استعمال ہونے والی اشیا سے پیدا ہونے والے کچرے کے استعمال کے زبردست امکانات کو اجاگر کیا۔ چیئرمین نے تجاویز کو قبول کیا اور زور دے کر کہا کہ اس سے سرمایہ کاری ،روزگار و ترقی کو بڑھاوا ملے گا اور یہ سرکلر معیشت کو فروغ دینے کے لیے وزیراعظم کے ویژن کے عین مطابق ہے۔ چیئرمین نے متعلقہ فریقوں سے زور دے کر کہا کہ وہ  اسٹیل کے شعبے میں سرکلر معیشت کو فروغ دینے اور کچرے کو دولت میں بدلنے کے لیے واضح اقدامات کریں۔

میٹنگ کے دوران سرکلر معیشت کے تصور کی وضاحت کی جس میں قدرتی وسائل کے استعمال کو کم سے کم کرنا شامل ہے۔ اس میں چھ اصولوں کپر عمل کیا جانا بھی شامل ہیں جو اس طرح ہیں، کم استعمال کیجیے، دوبارہ استعمال کیجیے، دوبارہ قابل استعمال بنایئے، خراب کو صحیح کیجیے، دوبارہ ڈیزائن کیجیے اور دوبارہ تیار کیجیے۔ جس کا مقصد وسائل  سے حاصل ہونے والے سامان کو زیادہ زیادہ کفایتی طور پر استعمال کرنا اور ماحول پر پڑنے والے اثرات کو کم کرنا ہے۔

کمیٹی کو بتایا گیا کہ اسکریپ اور دوسرے کچرے والی اشیا کے ذریعے اسٹیل تیار کرنا  ماحول دوست اسٹیل کی جانب ایک قدم ہے۔ یہ بات بھی اجاگر کی گئی کہ  کانکنی اور اسٹیل بنانے کے دوران مختلف قسم کے کچرے ، اسکریپ اور ضمنی مصنوعات کو اسٹیل بنانے اور سیمنٹ تیار کرنے ، سڑک تعمیر کرنے اور زراعت جیسی دوسری جگہوں پر استعمال کرنے کے لیے موثر طور پر استعمال کیا جاسکتا ہے۔

میٹنگ میں اسٹیل کے شعبے میں موقعوں ، فوائد ، چیلنجوں اور سرکلر معیشت تشکیل دینے کے معاملات پر کمیٹی کے ارکان کے ساتھ بات چیت ہوئی۔ کمیٹی کے ارکان نے اسٹیل کی وزارت کے کام کو سراہا اور اسٹیل کے شعبے میں سرکلر معیشت کے مقصد کو حاصل کرنے کے لیے مختلف اقدامات کی تجویز رکھی۔ کمیٹی کے ارکان نے دیہی علاقوں میں بیداری لانے اور اسٹیل کے استعمال میں اضافہ کرنے کی ضرورت پر بھی زور دیا۔ اسٹیل کے استعمال میں اضافے سے مستقبل میں اسٹیل اسکریپ کی دستیابی میں اضافہ ہوگا۔ ارکان نے مشورہ دیا کہ غیررسمی شعبے کو رسمی شعبے سے مربوط کرنے کے لیے اقدامات کیے جانے چاہئیں جس سے اسٹیل کے شعبے میں سرکلر معیشت کے لیے ایک سازگار ماحول تشکیل دینے میں مدد ملے گی۔

ارکان پارلیمنٹ – جناب بدیوت برن مہتو ، چندر پرکاش چودھری ، جناردن سنگھ سیگریوال ، سپت گری سنکر اولاکا، وجے باگھیل اور اکھیلاس پرساد سنگھ نے میٹنگ میں شرکت کی۔ اسٹیل کی وزارت اور سی پی ایس ای کے سینئر افسران بھی اس میٹنگ میں موجود تھے۔

 

۔۔۔