میزائل 150 کلومیٹر سے 500 کلومیٹر کے درمیان ہدف کو بنا سکتاہے نشانہ
ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) نے نئی نسل کے سطح سے سطح مارکرنے والی کم فاصلے کے بیلسٹک میزائل’پرلیہ‘ کا پہلا فلائٹ ٹیسٹ بدھ کے روز اڈیشہ کے ساحل پر واقع کلام جزیرے سے تقریباً 10.30 بجے کیا۔ یہ میزائل 150 سے 500 کلومیٹر تک ہدف کو نشانہ بنا سکتا ہے۔ مشن نے اپنے تمام مقاصد پورے کئے۔ اس دوران نگرانی کے آلات کے ذریعہ کوسٹ لائن سے اس کی لانچنگ کی نگرانی کی گئی۔
ڈی آر ڈی او کے مطابق، میزائل نے مطلوبہ نیم بیلسٹک رفتار کی پیروی کی اور کنٹرول، رہنمائی اور مشن الگورتھم کی توثیق کرتے ہوئے اعلیٰ درجے کی درستگی کے ساتھ مخصوص ہدف کو نشانہ بنایا۔ میزائل کے تمام ذیلی نظاموں نے بھی تسلی بخش کارکردگی کا مظاہرہ کیا۔ڈاؤن رینج کے جہازوں سمیت مشرقی ساحل پر امپیکٹ پوائنٹ کے قریب تعینات تمام سینسرز نے میزائل کی ٹریجیکٹری کو ٹریک کیا اور تمام واقعات کو کیپچر کیا۔ یہ میزائل ٹھوس پروپیلنٹ راکٹ موٹر اور کئی نئی ٹیکنالوجیز سے چلتا ہے۔ میزائل کی رینج 150-500 کلومیٹر ہے اور اسے موبائل لانچر سے لانچ کیا جا سکتا ہے۔ میزائل گائیڈنس سسٹم جدید ترین نیویگیشن سسٹم اور انٹیگریٹیڈایویونکس پر مشتمل ہے۔ سطح سے سطح پر مار کرنے والا یہ میزائل 500 سے 1000 کلو گرام تک وزن لے جانے کی صلاحیت رکھتا ہے۔
وزیر دفاع راج ناتھ سنگھ نے ڈی آر ڈی او اور متعلقہ ٹیموں کو اس پہلے ترقیاتی فلائٹ ٹیسٹ کے لیے مبارکباد دی۔ انہوں نے سطح سے سطح پر مار کرنے والے جدید میزائل کی تیز رفتار ترقی اور کامیاب لانچنگ کے لیے ڈی آر ڈی او کی ستائش کی۔ ڈپارٹمنٹ آف ڈیفنس ریسرچ اینڈ ڈیولپمنٹ کے سکریٹری اور ڈی آر ڈی او کے چیئر مین ڈاکٹر جی ستیش ریڈی نے ٹیم کی تعریف کرتے ہوئے کہا کہ یہ نئی نسل کی سطح سے سطح پر مار کرنے والا میزائل ہے جو جدید ٹیکنالوجی سے لیس ہے۔ اس ہتھیاروں کے نظام کی شمولیت سے مسلح افواج کو ضروری فروغ ملے گی۔
