مرکزی سرکار ویکسین سپلائی کے لیے مسلسل کام کر رہی ہے: وزیر اعظم

وزیراعظم نریندر مودی نے کووڈ ویکسین کو برباد ہونے سے بچانے کی ضرورت اجاگر کی ہے اور کہاہے کہ ویکسین کی ایکڈوز  کی بربادی کا مطلب ایک زندگی کو بچانے کے لیے ضروری ڈھال فراہم نہ کرپانا ہے۔وزیراعظم نے کل کووڈ-19 صورت حال کے بارے میں 10 ریاستوں کے ضلع عہدیداروں کے ساتھ گفتگو کی۔انہوں نے کہاکہ سرکار ٹیکوں کی سپلائی برقرار رکھنے کی خاطر لگاتار کام کر رہی ہے۔ 

وزیراعظم نے کووڈ-19 عالمی وبا سے پیدا چیلنجوں سے مؤثر طور پر نمٹنے کی خاطر لگاتار اختراعی اور سرگرم طور طریقے اور حکمت عملی اپنائے جانے پر بھی زور دیا۔ انہوں نے کہاکہ یہ وائرس لگاتار اپنی شکل بدل رہا ہے اور سائنسداں اپنا روپ بدلنے والے وائرس سے نمٹنے کے لیے کام کر ہے ہیں۔ 

جناب مودی نے کہاکہ کورونا وائرس کی دوسری لہر کے تناظر میں اپنی شکل بدلنے والا وائرس، بالغ افراد کے ساتھ ساتھ بچوں کے لیے بھی باعث تشویش ہے۔ انہوں نے ریاستوں کی انتظامیہ اور ضلع عہدیداروں سے کہاکہ وہ اِس متعدی بیماری کی سنگین نوعیت کے تعلق سے معلومات کا جائزہ لے کر اِس چیلنج کا سامنا کرنے کیلئے تیاری کریں۔ 

کووڈ کے تعلق سے احتیاطی اقدامات پر عمل کیے جانے پر زور دیتے ہوئے وزیراعظم نے کہاکہ کووڈ-19 کے خلاف لڑائی میں مناسب احتیاط برتنا ایک بڑا ہتھیار ہے۔

وزیراعظم نے کہاکہ ہماری ترجیح زندگی بچانے کے ساتھ ساتھ زندگی کو سہل بھی بنانا ہے۔ جناب مودی نے کہاکہ غریب لوگوں کیلئے مفت راشن اور دیگر ضروری رسد کے لیے سہولیات ہونی چاہئیں۔ وزیراعظم نے کالا بازاری روکنے کی ضرورت پر بھی زور دیا۔