صنعت و تجارت، امور صارفین، خوراک اور عوامی تقسیم کے علاوہ  ٹیکسٹائل کے مرکزی وزیر جناب پیوش گوئل نے آج کہا کہ اب دنیا ہندوستان کو اقتصادی ترقی کا سالار سمجھتی ہے۔ وہ آج نئی دہلی میں ویاپری ادمی سمیلن میں مجمع سے خطاب کررہے تھے۔

اس بات پر زور دیتے ہوئے کہ ہندوستان کو آج دنیا کا اعتماد حاصل ہے جناب گوئل نے کہا کہ ترقییافتہ ممالک اب ہندوستان کے ساتھ تجارتی معاہدوں کے انتہائی خواہشمند ہیں۔ انہوں نے مزید کہا کہ 2014 سے پہلے ہندوستانی معیشت کو کمزور سمجھا جاتا تھا اور سرمایہ کار ہندوستان کے ساتھ کاروبار کرنے کے تعلق سے شبہات رکھتے تھے۔

وزیر موصوف نے شفافیت اور کاروبار کرنے میں آسانی کی ضرورت پر زور دیتے ہوئے تاجروں اور صنعت کاروں کو یقین دلایا کہ حکومت ان تاجروں کی مکمل حمایت کرے گی جو کسی بھی مقتدرہ کے ذریعہ ہراساں کئے جانے کے خلاف آواز اٹھاتے ہیں۔

انہوں نے تاجروں پر زور دیا کہ وہ حکومت کے ساتھ مل کر لوگوں اور کاروباری اداروں پر تعمیل کے بوجھ کو کم کریں لیکن اخلاقی تجارتی طریقوں پر سختی سے عمل پیرا رہیں۔ انہوں نے مزید کہا کہ کاروبار کرنے میں آسانی کو بہتر بنانے کے لئے غیر ضروری، بوجھل اور مخالف پیداواری قوانین اور ضوابط کو جڑ سے اکھاڑ پھینکا جانا چاہیے۔

انہوں نے تاجروں سے کہا کہ وہ اشیا اور خدمات میں ہندوستان کے پیش کردہ معیار کو ترجیح دیں۔ انہوں نے نوجوانوں کو آگے آنے اور نئے خیالات کے ساتھ ہندوستان کی ترقی کی کہانی سے نوجوان کو ترغیب دینے کی ضرورت پر بھی زور دیا۔ وزیر نے کہا کہ قوم کے نوجوانوں کو وزیر اعظم جناب نریندر مودی کی طرف سے دی گئی ’ووکل فار لوکل‘ کی واضح پُکار کو آگے بڑھانا چاہیے۔ انہوں نے مزید کہا کہ ہمیں زیادہ سے زیادہ خواتین کو تاجر اور صنعت کار بننے کی ترغیب دینی چاہیے۔

جناب گوئل نے وزیر اعظم کی بصیرت افروز فلاحی پالیسیوں کی تعریف کرتے ہوئے کہا کہ یہ پالیسیاں غریبوں کو صارفین کے طور پر ابھرنے میں مدد فراہم کر رہی ہیں اور ہندوستان کی آبادی کو کامیابی کے ساتھ اپنی سب سے بڑی طاقت میں تبدیل کر رہی ہیں۔

انہوں نے مزید کہا کہ وزیر اعظم کی انتھک محنت نے اس بات کو یقینی بنایا ہے کہ ملک کے ہر گھر کو کھانا پکانے کی گیس، پینے کے پانی، بجلی اور رفع حاجت گاہ جیسی بنیادی سہولتیں میسر ہوں اور ہر گاؤں تک انٹرنیٹ کی رسائی ہو۔ جناب گوئل نے کہا کہ حکومت کی پالیسیوں نے ہر ہندوستانی کو اہمیت کا حامل اور صنعت کار بننے کی  ہمت اور خواہش سے لیس کیا ہے۔

وزیر موصوف نے اس بات پر بھی زور دیا کہ تاجروں اور بہت چھوٹی، چھوٹی اور درمیانی صنعتوں (ایم ایس ایم ایز) کو وزیر اعظم  مودی کی فلاحی اسکیموں سے فائدہ اٹھانے والوں کی طرف سے سامان کی مانگ سے فائدہ اٹھانا چاہئے۔ انہوں نے بڑے اور چھوٹے تمام تاجروں، صنعت کاروں اور کاروباریوں سے کہا کہ وہ زیادہ سے زیادہ ہندوستانی مصنوعات کو فروغ دے کر خود کفیل ہندوستان کے خواب کو شرمندہِ تعبیر کرنے کے لئے مل کر کام کرنے کا اجتماعی عزم کریں۔