پولیس نے ترنمول کانگریس کے لیڈر انوار الحسین کو گرفتار کر لیا ہے، جو اس واقعہ کا اہم ملزم ہے۔ اس پربیر بھوم ضلع کے رام پورہاٹ بلاک کے گاؤں میں آٹھ لوگوں کو زندہ جلا دینے کا الزام ہے۔
وزیر اعلیٰ ممتا بنرجی، جو جمعرات کی دوپہر موقع پر پہنچی، متاثرین سے بات کرنے کے بعد، اس معاملے کے ملزم رام پورہاٹ بلاک سے ترنمول کانگریس کے صدر انوار الحسین کو گرفتار کرنے کا حکم دیا تھا۔ اس کے بعد سے پولیس متحرک ہوگئی اور حکم کے دو گھنٹے کے اندر، پولیس نے انوارالحسین کو گرفتار کر لیا۔ پولیس کا دعویٰ ہے کہ وہ فرار ہونے کی کوشش کر رہا تھا لیکن اس کے فون کی لوکیشن مسلسل ٹریس کی جا رہی تھی اور پھر اسے گرفتار کر لیا گیا۔
انوارالحسین پر پیر کی رات ترنمول لیڈر بھدو شیخ کے قتل کے بعد لوگوں کو اکسانے اور گاؤں کے 10 سے 12 گھروں میں آگ لگانے والوں کی قیادت کرنے کا الزام ہے۔ اس بات کا انکشاف گاؤں کے لوگوں نے وزیر اعلیٰ کے سامنے کیا۔ جس کے بعد انہوں نے اس کی گرفتاری کا حکم دیا۔
کہا جاتا ہے کہ انوارالحسین کسی زمانے میں بیر بھوم کے رام پورہاٹ قصبے کے نزدیک مستری کا کام کرتا تھا۔ پہلے وہ کانگریس کے حامی تھا۔ ترنمول کی تشکیل کے بعد وہ کانگریس چھوڑ کر ترنمول کیمپ میں شامل ہو گیا۔ وہ رفتہ رفتہ رام پورہاٹ کے ایم ایل اے اور سابق ریاستی وزیر اور قانون ساز اسمبلی کے موجودہ ڈپٹی اسپیکر آشیش بندیوپادھیائے کے قریب ہو گیا۔ اس کے علاوہ وہ ترنمول بیربھوم ضلع صدر انوبرت منڈل کا بھی قریبی تھا۔ پارٹی نے اسے رام پورہاٹ بلاک کا صدر بنایا تھا۔
