اترپردیش میں آئندہ 2022 میں ہونے والے اسمبلی انتخابات کے پیش نظر بھارتیہ جنتا پارٹی (بی جے پی) کی انتخابی تیاریوں کے لیے تمام ضروری کیل کانٹے کسنے شروع کردیئے گئے ہیں۔ وزیر اعلیٰ یوگی آدتیہ ناتھ کی قیادت میں انتخابی سیزن میں داخل ہونے سے پہلے، بی جے پی کی قیادت نے حالیہ دنوں میں اسٹریٹجک نقشہ تیار کرنے کے ساتھ ساتھ ووٹوں کی کھسکی ہوئی شرح کو حاصل کرنے کے لیے واضح طور پر اپنا نقطہ نظر پیش کیا ہے۔

 یوگی نے مرکزی قیادت کی منشا کے مطابق تمام ضروری اقدامات کرنے کی بھی یقین دہانی کرائی ہے۔ اس کے ساتھ ہی بی جے پی نے پوری طاقت کے ساتھ 'مشن یوپی' میں داخل ہونے کا عندیہ دیا ہے۔ جمعہ کو وزیر اعظم سے ملاقات کے بعد ، یوگی نے ٹویٹ کیا ، "آج نئی دہلی میں معزز وزیر اعظم سے ملاقات اور رہنمائی حاصل کرنے کا اعزاز حاصل ہوا ۔ معزز وزیر اعظم کا دلی شکریہ کہ انہوں نے ہمارے روز مرہ معمولات سے بالاتر ہو کر ملاقات کے لیے وقت دیا اور ہمہ وقت رہنمائی کی۔

اپنے دہلی دورے کے دوسرے دن ہی ، یوگی نے وزیر اعظم اور بی جے پی صدر جے پی نڈا سے ملاقات کی۔ ذرائع نے انکشاف کیا ہے کہ وزیر اعظم نریندر مودی نے یوگی سے اتر پردیش کی سیاسی صورت حال کے بارے میں دریافت کیا اور یوگی کی انتخابی حکمت عملی سے آگاہی حاصل کی۔ مودی یوگی کی ڈیڑھ گھنٹے کی میٹنگ کے دوران ، تنظیم اور حکومت کے مابین بہتر ہم آہنگی ، ممبران اسمبلی اور کچھ ممبران پارلیمنٹ کی شکایات کا ازالہ ، پنچایت انتخابات میں ووٹ کی کم ہوئی فیصد کو حاصل کرنے ، تمام ذاتوں کو اور بہن بھائیوں کو ساتھ لے کرہم آہنگی پرزور دیا گیا۔

شاہ ، مودی اور نڈا کے ساتھ یوگی کی سلسلہ وار ملاقات کو اترپردیش میں کابینہ میں توسیع کے امکانات سے بھی جوڑا جارہا ہے۔ وزیر اعلی ٰکے دہلی کے دورے سے ایک دن قبل ، سابق مرکزی وزیر اور کانگریس کے رہنما جتن پرساد نے بی جے پی میں شمولیت اختیار کی ہے۔ اسی دوران ، وزیر اعظم کے قابل اعتماد سابق بیوروکریٹ اور اتر پردیش میں بی جے پی سے قانون ساز کونسل کے رکن اروند کمار شرما بھی پچھلے کچھ دنوں سے دہلی میں ڈیرہ ڈالے ہوئے ہیں اور امت شاہ سمیت پارٹی کے دیگر رہنماؤں سے بھی ملاقات کر رہے ہیں۔ اگرچہ ابھی تک اترپردیش میں کابینہ میں توسیع کے بارے میں کوئی سرکاری معلومات نہیں ہیں ، لیکن ذرائع کا کہنا ہے کہ ریاست میں معروف برہمن خاندان اور مضبوط سیاسی اثر و رسوخ رکھنے والے جتن پرساد اور شرما کو اس ممکنہ توسیع میں شامل کیا جائے گا۔