بزم تحفظ اردو کی جانب سے احمد ایجوکیشنل اکیڈمی ہال میں نشست منعقد

فتح پور،بارہ بنکی(ابوشحمہ انصاری)

 بزم تحفظ اردو کی جانب سے احمد ایجوکیشنل اکیڈمی ہال فتحپور میں مصرع طرح ’’غزل کی نوک ،پلک سب سنوار دیتا ہے‘‘۔ پر ایک طرحی نشست کا انعقاد زیر پرستی حاجی مطیع اللہ حسینی کیا گیا۔حافظ نیاز الدین کی تلاوت سے شروع ہونے والی اس طرحی نشست کی صدارت راہی صدیقی نے کی اور نظامت کے فرائض حسان ساحر نے ادا کئے جب کہ مہمان خصوصی کی حیثیت سے قاری ذکی اللہ نے شرکت فرمائی۔

 راہی صدیقی نے اپنے صدارتی خطاب میں کہا کہ اردو کی خدمت کرنے کے لیے، اردو کو سیکھنا ہوگا۔ ان نشستوں سے ہمیں اردو سیکھنے کا موقع ملتا ہے۔ ہم سبھی کی ذمہ داری ہے کہ ان نشستوں سے آراستہ ہو کر فیض حاصل کریں۔ طرحی نشست کے پسندیدہ اشعار نذر قارئین ہیں۔

جو باشعور قلمکار ہے وہ لفظوں سے

غزل کی نوک پلک سب سنوار دیتا ہے

راہی صدیقی

وہی تو شخص فرشتہ صفت ہے کہلاتا

جو اپنے نفس کی خواہش کو مار دیتا ہے

احمد سعید حرف

بلندیوں پہ نہ اتراؤ وقت کے حاکم

خدا غرور کا نشہ اتار دیتا ہے

مطیع اللہ حسینی

سوال وصل پہ انکار کر کے اے ظالم

جنون عشق کا نشہ اتار دیتا ہے

حسان ساحر

خدا ہی جیتنے والوں کو ہار دیتا ہے

بڑے بڑوں کا تکبر اتار دیتا ہے

وثیق الرحمن شفق

نظر میں گھر ہے تیری، اسکا جانتا ہوں میں

مدد کے نام پہ جس کو ادھار دیتا ہے

حسیب یاور

اس کے علاوہ سلمان فتحپوری، جاوید یوسف، محفوظ فتحپوری نے بھی اپنا طرحی کلام پیش کیا۔اس موقع پر محمد عقیق عرف پپو، محمد انظر، علی اشہد، محمد جاوید، شرف الدین وغیرہ موجود رہے_ بزم کی اگلی طرحی نشست مصرع طرح ’’آپ کو جب سے میں نے دیکھا ہے‘‘۔پر، 30 اپریل2023، بروز – اتوار بعد نماز عشاء منعقد ہوگی۔