کانگریس: مرتا ، کیا نہیں کرتا؟
کانگریس پارٹی آج کل نظریاتی انحطاط کی مثال بن رہی ہے۔ نہرو کی کانگریس ، جس نے ملک میں سیکولرازم کا جھنڈا بلندکیا تھا ، آج اسی کانگریس کے ہاتھ میں ہے ، لیکن یہ جھنڈا فرقہ واریت کا پرچم لہرا رہا ہے۔ فرقہ واریت بھی کیسی ؟ تمام اقسام کی،الٹی بھی سیدھی بھی ۔ یعنی جو بھی ووٹ دلاسکے ۔
کانگریس نے محسوس کیا کہ بی جے پی ملک میں اس لئے دندنارہی ہے کیونکہ وہ ہندو فرقہ واریت کو فروغ دے رہی ہے ، پھر انہوں نے بھی ہندو مندروں ، مٹھوں ، مقدس ندیوں ، سنتوں اور سنتوں کے آشرموں کے چکر لگانے شروع کردیئے ، لیکن پھربھی اس کا کوئی ٹھوس اثر نہیں ہوا۔ اب انہوں نے بنگال ، آسام اور کیرالہ کی مسلم پارٹیوں کے ساتھ ہاتھ ملایا۔
کانگریس نے بنگال میں عباس صدیقی کے 'انڈین سیکولر فرنٹ' ، آسام میں بدرالدین اجمل کے 'آل انڈیا یونائیٹڈ فرنٹ' اور کیرالا میں 'ویلفیئر پارٹی' کے ساتھ اتحاد کیوں کیا ، تاکہ جہاں ان جماعتوں کے امیدوار نہ ہوں ، وہاں مسلم ووٹ کانگریس کو ملے۔ کیا کانگریس ان ووٹوں سے الیکشن جیت سکتی ہے؟
بالکل نہیں! پھر کانگریس نے اس طرح کے سمجھوتے اور معاہدے کیوں کیے ہیں؟ یہی وجہ ہے کہ اس نے ان تمام ریاستوں میں اپنا سپورٹ بیس کھو دیا ہے۔ لہذا ، جو بھی ووٹ ، جیسے بھی سمیٹاجاسکے ،سمیٹ لیاجائے۔
میں نے ان پارٹیوں کے ساتھ کانگریس کے اتحاد کو ٹھگ بندھن کا نام دیا ہے ، کیونکہ ایسا کرنے سے کانگریس اپنے کارکنوں کو دھوکہ دے رہی ہے ، وہ ان مسلم ووٹرز کو بھی دھوکہ دے رہی ہے۔ کانگریس کو ووٹ دینے سے ان ریاستوں کے مسلم ووٹر اقتدار سے بہت دور ہوجائیں گے۔ کانگریس کی شکست یقینی ہے۔
اگر یہ مسلم ووٹر دیگر غیر بی جے پی پارٹیوں کے ساتھ رہتے تو وہ کسی بھی حکمران جماعت کے ساتھ ہوتے یا انہیں اسی ریاست کی بااثر جماعت کی سرپرستی حاصل ہوتی۔
کانگریس کے اس چال چلن کی مخالفت آنند شرما جیسے سینئر رہنماوں نے دو ٹوک الفاظ میں کی ہے۔ کانگریس ایک آل انڈیا پارٹی ہے لیکن اس کی پالیسیوں میں پورا ہندوستان کہاں ہے؟
وہ بنگال میں جس کمیونسٹ پارٹی کے ساتھ ہیں کیرالہ میں اسی کے خلاف لڑ رہی ہیں۔ مہاراشٹرا میں ، وہ سخت گیر ہندو مذہبی سیاسی پارٹی شیوسینا کے ساتھ حکومت میں اور تین صوبوں میں مسلم اداروں کے ساتھ اتحاد میں ہیں۔ دوسرے لفظوں میں ، کانگریس کسی بھی قیمت پر اپنی جان بچانے کی کوشش کر رہی ہے۔ مر تا ، کیا نہیں کرتا؟
ڈاکٹر ویدپرتاپ ویدک
(مضمون نگار مشہور صحافی اور کالم نگار ہیں)
