<h3 style="text-align: center;">جموں وکشمیرکرکٹ گھوٹالہ میں فاروق عبداللہ سے ای ڈی کی پوچھ تاچھ</h3>
<p style="text-align: right;">نئی دہلی ، 19 اکتوبر</p>
<p style="text-align: right;">انفورسمنٹ ڈائریکٹوریٹ (ای ڈی) آج جموں و کشمیر کرکٹ ایسوسی ایشن گھوٹالہ کے سلسلے میں نیشنل کانفرنس کے سرپرست فاروق عبد اللہ سے پوچھ گچھ کر رہا ہے۔ یہ انکوائری سری نگر میں ای ڈی کے دفتر میں کی جارہی ہے۔ اس گھوٹالے میں تقریبا 113 کروڑ روپئے کی دھاندلی ہوئی ہے اور اس وقت فاروق عبد اللہ جموں و کشمیر کرکٹ ایسوسی ایشن کے صدر تھے۔</p>
<p style="text-align: right;"> قابل ذکر ہے کہ جموں و کشمیر کرکٹ ایسوسی ایشن میں کروڑوں کا یہ گھوٹالہ کیس کافی پرانا ہے۔ اس سے قبل جموں وکشمیر پولیس اس کی تحقیقات کر رہی تھی۔ بعدازاں اسے عدالت کے حکم پر سی بی آئی کے حوالے کردیا گیا۔ سی بی آئی جانچ کے مطابق2002 اور 2012 کے درمیان، بی سی سی آئی نے 113 کروڑ جموں و کشمیر کرکٹ ایسوسی ایشن کو ریاست میں کھیل کود کے فروغ کے لیے دیا تھا۔ لیکن فنڈ مکمل طور پر خرچ نہیں کیا گیا تھا جسمیں43.69 کروڑغبن کیا گیا ہے۔ اس کے بعد سارا معاملہ منی لانڈرنگ سے منسلک ہوگیا اور اب ای ڈی بینک دستاویزات کی بنیاد پر فاروق سے پوچھ گچھ کررہی ہے۔</p>.