کاروان انسانیت تنظیم کے تحت 24 ویں برسی پر جذباتی خراج عقیدت

بارہ بنکی،(ابوشحمہ انصاری)

آبروئے غزل حضرت خمار بارہ بنکوی کی 24 ویں برسی کے موقع پر آج شعرا اور ادبا نے ان کی قبر واقع کر بلا سول لائن پہنچ کر گلپوشی کر کے انہیں جذباتی خراج عقیدت پیش کیا۔

کاروان انسانیت تنظیم کے صدر طارق جیلانی نے کہا کہ مرحوم خمار صاحب نے اردو شاعری کو نیا رنگ و آہنگ عطا کیا۔ انہوں نے نصف صدی سے زیادہ نہ صرف ہندوستان بلکہ دنیا کے مختلف مقامات پر ہونے والے مشاعروں سے جو اعلیٰ مقام حاصل کیا شاید ہی اس کی دوسری مثال مل سکے۔

انہوں نے بتایا کہ ہماری تنظیم نوجوان شعرا کی حوصلہ افزائی کے لیے مختلف تقریبات میں خمار ایوارڈ پیش کرتی ہے۔شاعر امیر حمزہ اعظمی نے کہا کہ مرحوم خمار صاحب نے ضلع کو اپنی شاعری اور فلمی نغمہ نگاری کے ذریعہ عالمی سطح پر پہچان عطا کی۔

 شاعر ہاشم علی ہاشم نے خمار بارہ بنکوی کے فن اور حیات کے مختلف گوشوں پر روشنی ڈالی۔آدرش بارہ بنکوی نے خمار صاحب کی شخصیت اور شاعری پر مبنی نظم پیش کی۔ اس موقع پر شعیب انور، سلیم صدیقی، شمیم بارہ بنکوی، اور زاہد بارہ بنکوی نے بھی خراج عقیدت پیش کیا۔ کنویز فیض خمار نے مہمانوں اور شرکا کا شکر یہ ادا کیا۔