ادے پور میں کنہیا لال کےقتل کا جو واقعہ پیش آیا ۔ ہم اس واقعہ کی سخت مذمت کرتے ہیں اور مطالبہ کرتے ہیں کہ ریاستی حکومت امن کو برقرار رکھتے ہوئے سخت سے سخت کاروائی کرے ۔ اور جو امن وآشتی کا دشمن ہے وہ ہمارا اور رسول خدا کا بھی دشمن ہے ۔کسی کو قتل کرنا نہ اسلام کی تعلیمات کا حصہ ہے اور نہ ہی محمد مصطفیٰ صلی اللہ علیہ وسلم نے اپنی امت کو یہ تعلیم دی ۔
اگر ہم رسول خدا کی زندگی کا جائزہ لیتے ہیں تو پتا چلتا ہے کہ آپ ﷺ نے اپنے سخت ترین جانی دشمنوں سےبھی نہ خود کبھی انتقام لیا اور نہ ہی اپنے صحابہ کو لینے دیا ۔اللہ تبارک و تعالیٰ نے نبی کریم صلی اللہ علیہ وسلم کو رحمۃ للعالمین بناکر بھیجا تو آپ نے اپنے دشمنوں ( جنہوں نے پتھر برساکر آپ کو اور آپ کے خادم کو لہو لہان کردیا تھا ) کے لیے دعا فرمائی اور دوپہاڑوں کے درمیان کچلنے کی تجویز کو قبول نہیں فرمایا ۔
نیز ہمیں جاننا چاہیے کہ اسلام صاف ،اور واضح مذہب کا نام ہے ۔اسلام وہ ہے جو آپ صلی اللہ علیہ وسلم نے اپنے دشمنوںکے سامنے پیش کیا ۔اسلام تلوار کا نام نہیں ،بلکہ اسلام اخلاق ورواداری کا نام ہے ۔اسلام مساوات وبرابری کا نام ہے ۔
جن لوگوں نے انسانیت کاقتل کیا ہے ہم انہیں بتانا چاہتے ہیں کہ کسی کو قتل کرنا عشق رسول کا تقاضہ نہیں بلکہ عشق رسول کے برعکس اور مخالف ہے ۔عشق رسول تو یہ ہے کہ ہر ایک کے ساتھ اخلاق ورواداری اور صلہ رحمی کے ساتھ پیش آیا جائے ۔
لہذا میں ادے پور کے اس واقعہ کی سخت ترین مذمت کرتا ہوں اور حکومت سے مطالبہ کرتا ہوں کہ اس کے مجرمین کو سخت سے سخت سزا دی جائے ۔
شاہ عمار احمد احمدی
سجادہ نشیں خانقاہ حضور شیخ العالم علیہ الرحمہ
قومی نائب صدر آل انڈیا علماءومشائخ بورڈ
قومی نائب صد ر آل انڈیا صوفی سجادہ نشین کونسل
