Urdu News

ماہِ رمضان خوش آمدید: ذکی طارق بارہ بنکوی

ذکی طارق بارہ بنکوی

اردو شاعری کی دنیا میں اس وقت بہت زیادہ موضوعِ تذکرہ  میں رہنے والا نام ” ذکی طارق بارہ بنکوی “کا ہے۔ جس نے اپنی شاعری کے ذریعے بہت کچھ کہا ہے اور مسلسل کہے جا رہے ہیں۔ان کا دل بے حد کشادہ ہے.انہوں نے جہاں اپنے گرد و نواح کی مختلف زبانوں کے الفاظ کو اپناتے ہوئے اپنے آپ کو عام فہم بناتے ہوئے خود کو دوسری زبانوں کے مختلف الفاظ سے مالا مال کیا ہے وہیں دوسری زبانوں کے ادب میں رائج مختلف اصنافِ سخن کو اپناتے ہوئے ان پر خوب طبع آزمائی کی ان کی شاعری میں آمد کی جھلک صاف صاف دکھائی دیتی ہے۔

ان کی نظموں اور غزلوں میں انسانی زندگی اور سماج کے مسائل پر کافی سنجیدہ  بحث ملتی ہے۔ وہ ان مسائل کو حل کرنے اور اور سماج میں پھیلی ہوئی ان گنت برائیوں کو اپنی شاعری کے ذریعے دور کرنے کی جگہ جگہ کوشش کرتے ہیں۔یہ بےحد ذہین ہیں ویسے تو جناب  ذکی طارق غزل اور نظم کے شاعر ہیں لیکن نعت گوئی میں بھی ان کو مہارت حاصل ہے۔ بلکہ یہ کہنا غلط نہیں ہوگا کہ شاعری کی ایسی کوئی بھی صنف نہیں جس پر انہوں نے طبع آزمائی نہ کی ہو ان کی تخلیق کی ہوئی حمد ، نعت ، منقبت ، قوالی ، گیت اور غزل وغیرہ ہمیشہ ہی اخباروں اور رسائل میں شائع ہوتی رہتی ہیں۔قارئین کی خدمت میں ’’ ماہِ رمضان خوش آمدید‘‘پیش ہے۔جس سے ذکی طارق صاحب کی شاعری سمجھنے میں مدد ملے گی۔

ماہِ رمضان خوش آمدید

ماہِ رمضان خوش آمدید

فیضِ رحمان خوش آمدید

مرحبا اپنے ہمراہ تو

لایا قرآن خوش آمدید

       ماہِ رمضان خوش آمدید

بے بہا رحمتوں کے امیں

ماہِ ذیشان خوش آمدید

        ماہِ رمضان خوش آمدید

دل نظر ذہن سب ہو گئے

رشکِ ایمان خوش آمدید

        ماہِ رمضان خوش آمدید

ہر طرف نور ہی نور ہے

تیری یہ شان خوش آمدید

        ماہِ رمضان خوش آمدید

سال کے سب مہینے ترے

سب کے سلطان خوش آمدید

        ماہِ رمضان خوش آمدید

تیری آمد نے ایمان کو

بخش دی جان خوش آمدید

        ماہِ رمضان خوش آمدید

لمحہ لمحہ ملا ہے ہمیں

فیضِ قرآن خوش آمدید

        ماہِ رمضان خوش آمدید

آفریں تو نے کروا دیا

قید شیطان خوش آمدید

        ماہِ رمضان خوش آمدید

برکتوں سے شرابور اے

رب کے فیضان خوش آمدید

        ماہِ رمضان خوش آمدید

ذکی طارق بارہ بنکوی،سعادت گنج،بارہ بنکی، یوپی

Recommended