اتراکھنڈ کے ایک گاؤں میں جنگلات اور درختوں کی کٹائی کے خلاف شروع ہوااحتجاج ماحولیات کے تحفظ کے لیے ایک عظیم قربانی میں تبدیل ہو گیا،جس کی مثالیں برسوں بعد بھی دی جاتی ہیں۔ ماحولیاتی تحفظ سے متعلق چپکو تحریک 26 مارچ 1974 کو اتراکھنڈ کے چمولی ضلع میں شروع ہوئی۔

چمولی ضلع میں ڈھائی ہزار درختوں کی نیلامی کے بعد جب ٹھیکیدار نے ان درختوں کو کاٹنے کے لیے مزدور بھیجے تو اسے غیر متوقع احتجاج کا سامنا کرنا پڑا۔

رائنی گاؤں کی 27 خواتین، گورا دیوی کی قیادت میں، نیلامی کے بعد کاٹے جانے والے درختوں سے لپٹ گئیں۔ ان خواتین کا کہنا تھا کہ انہیں درختوں پر آرا چلانے سے پہلے ان پر آرا چلانا ہوگا۔

حکومت کو آخر کار ان خواتین کی مزاحمت کے سامنے جھکنا پڑا۔چپکو تحریک کی قیادت نامور ماہر ماحولیات سندر لال بہوگنا، گووند سنگھ راوت اور چندی پرساد بھٹ نے کی لیکن اس میں خواتین نے اہم کردار ادا کیا۔

اس تحریک کا اثر ملک کے ایک بڑے حصے میں محسوس ہوا۔ تحریک کی گونج پوری دنیا میں سنی گئی۔