بابر اعظم کے پاس کرکٹ کی بہترین سمجھ: مصباح الحق

ہرارے،12مئی (انڈیا نیرٹیو)

پاکستان کے چیف کوچ مصباح الحق نے کپتان بابر اعظم کی تعریف کرتے ہوئے کہا کہ ان کے پاس کرکٹ کی بہترین سمجھ ہے۔ بابر نے پہلے ہی ایک بلے باز کے طور پر اپنے آپ کو ثابت کیا ہے اور اب وہ پاکستان کے ایسے کپتان بن گئے ہیں جنہوں نے اپنے پہلے چار میچوں میں جیت حاصل کی ہے۔ مصباح نے کہا کہ کپتانی ایک ایسی چیز ہے جو وقت کے ساتھ بہتر ہوتی جاتی ہے۔ جتنا زیادہ آپ کچھ حالات کا سامنا کریں گے اتنا ہی بہتر ہوگا۔ بابر کے پاس کرکٹ کی شاندار سمجھ ہے،انہوں نے بلے سے پہلے ہی کرکٹ کے سبھی فارمیٹ میں خود کو ثابت کیا ہے۔ امید ہے کہ مستقبل میں بھی وہ بہترین کارکردگی پیش کریں گے۔

پاکستان کرکٹ ٹیم کے ہیڈ کوچ نے اپنے اوپر تنقید کرنے والوں کے بارے میں کہا کہ مجھ پر تنقید کرنے والے اپنا خون جلاتے رہیں، مجھے فرق نہیں پڑتا۔ جنوبی افریقہ اور زمبابوے کے کامیاب دورے کے بعد ورچوئل پریس کانفرنس کرتے ہوئے مصباح الحق کا کہنا تھا کہ جنوبی افریقہ کی کنڈیشنز میں کامیابی آسان نہیں ہوتی۔انھوں نے مزید کہا کہ وائٹ بال کرکٹ میں مسائل سامنے آئے ہیں۔

ہیڈ کوچ نے اسی جانب اشارہ کرتے ہوئے کہا کہ مستقبل میں وہائٹ بال کی بڑی اہم سیریز ہیں۔ٹیم میں مڈل آرڈر کی اہمیت پر زور دیتے ہوئے مصباح الحق نے کہا کہ مڈل آرڈر مزید بہتر بنانے کی ضرورت ہے۔مصباح الحق کا کہنا تھا کہ خوشی ہے کہ پاکستان ٹیم درست سمت کی جانب گامزن ہے۔انھوں نے انگلینڈ کے خلاف سیریز کو اہمیت دیتے ہوئے کہا کہ انگلینڈ کے خلاف سیریز ورلڈکپ کی تیاری کا حصہ ہوگی۔ہیڈکوچ کا کہنا تھا کہ یہ تاثر غلط ہے کہ دورے کے دوران نوجوانوں کو موقع نہیں دیا گیا۔مصباح الحق نے کہا کہ مجھ پر تنیقد کرنے والے اپنا خون جلاتے رہیں مجھے فرق نہیں پڑتا، تنقید کرنے والوں کے لیے دعا ہی کرسکتا ہوں۔