ممبئی، 17 اپریل ( انڈیا نیرٹیو)

 بورڈ آف کنٹرول فار کرکٹ ان انڈیا (بی سی سی آئی ) نے سینئر مردوں اور خواتین کے ڈومیسٹک ٹورنامنٹس کی انعامی رقم میں بڑا اضافہ کیا ہے۔ بی سی سی آئی کے سکریٹری جے شاہ نے اتوار کے روز  ٹویٹر کے ذریعے مذکورہ معلومات دی۔

بی سی سی آئی کے سکریٹری جے شاہ نے کہا کہ جہاں مردوں کے لیے انعامی رقم میں60 سے 300 فیصد تک اضافہ کیا گیا ہے، وہیں خواتین کے دو ایونٹس میں 700 فیصد سے زیادہ اضافہ کیاگیا ہے۔

رنجی ٹرافی کی چیمپئن ٹیم کی انعامی رقم 2 کروڑ سے بڑھا کر 5 کروڑ روپئے کر دی گئی ہے، جب کہ فائنل اور سیمی فائنل میں ہارنے والی ٹیموں کے لیے بالترتیب3 کروڑ روپئے (پہلے ایک کروڑ روپئے) اور ایک کروڑ روپئے(پہلے 50 لاکھ روپے)کر دیئے  گئے ہیں۔

گھریلو ون ڈے ٹورنامنٹ وجے ہزارے ٹرافی کی انعامی رقم 30 لاکھ روپے سے بڑھا کر ایک کروڑ روپئے کر دی گئی ہے جبکہ رنر اپ ٹیم کو 15 لاکھ روپئے کی بجائے 50 لاکھ روپئے دیے جائیں گے۔ گھریلو ٹی ۔20 ٹورنامنٹ سید مشتاق علی ٹرافی میں انعامی رقم میں سب سے بڑا اضافہ دیکھا گیا ہے، جہاں فاتح کو 80 لاکھ روپئے (پہلے 25 لاکھ روپئے) اور رنر اپ کو 40 لاکھ روپئے (پہلے 10 لاکھ روپئے) سے نوازا جائے گا۔

خواتین کی سینئر ون ڈے اور ٹی۔ 20 ٹرافیوں کی چیمپئن اور رنر اپ ٹیمیں آخر کار نمایاں انعامی رقم کمانا شروع کر دیں گی۔ خواتین کی ون ڈے چیمپئن ٹیم کو 50 لاکھ روپئے (پہلے 6 لاکھ روپئے) جبکہ ٹی۔20 چیمپئن ٹیم کو 40 لاکھ روپئے (پہلے 5 لاکھ روپئے) کا انعام دیا جائے گا۔