چنئی سپر کنگس نے پنجاب کو ہراکر جیت کا کھاتہ کھولا ، ایک طرفہ میچ میں 6 وکٹوں سے شکست دی

ممبئی ، 17اپریل (انڈیا نیرٹیو)

انڈین پریمیر لیگ (آئی پی ایل) کے 14 ویں سیزن کا آٹھواں میچ پنجاب کنگس اور چنئی سپر کنگس کے مابین ممبئی کے وانکھیڑے اسٹیڈیم میں جمعہ کے روز کھیلا گیا۔ اس میچ میں چنئی سپر کنگس (سی ایس کے)نے پنجاب کنگس کو 6 وکٹوں سے شکست دے دی۔ پنجاب کے خلاف یہ اس کی مسلسل تیسری جیت ہے۔

چنئی کے کپتان مہندر سنگھ دھونی نے ٹاس جیتنے کے بعد پہلےگیندبازی کرنے کا فیصلہ کیا ہے اور پنجاب کی ٹیم کو بلے بازی کے لئے مدعو کیا۔ پنجاب نے 20 اوور میں 8 وکٹوں پر 106 رن بنائے۔ چنئی سپر کنگس نے محض15.4 اوور میں 4 وکٹوں پر 107 رن بنا جیت اپنے نام درج کر لی۔ چنئی کی جانب سے میچ میں معین علی نے سب سے زیادہ رن بنائے۔ انہوں نے 31 گیندوں پر 46 رن بنائے۔ اس دوران معین نے 7 چوکا اور ایک چھکا لگایا۔

فاف ڈوپلیس 33 گیندوں پر 36 رن بناکرناٹ آؤٹ رہے۔ انہوں نے تین چوکے اور ایک چھکا لگایا۔ان کے علاوہ سریش رینا 8 رن ، ریتوراج گائکواڈ 5 رن بنا کر آؤٹ ہوئے۔ امباتی رائیڈو تو کھاتہ بھی نہیں کھول سکے۔ سیم کرن نے ناٹ آوٹ 5 رن بنائے۔ پنجاب کی طرف سے محمد شامی نے دو جب کہ ارشدیپ سنگھ اور مورگن اشون نے ایک ایک وکٹ حاصل کی۔

پنجاب کی جانب سے شاہ رخ خان نے سب سے زیادہ رن بنائے۔ انہوں نے 36 گیندوں پر 47 رن بنائے۔ اس دوران انہوں نے 4 چوکے اور 2 چھکے لگائے۔ دیپک چاہر نے چنئی کی طرف سے خطرناک گیندبازی کی۔ انہوں نے 4 اوور میں 13 رن دے کر 4 وکٹیں حاصل کیں۔ ان کے علاوہ سیم کرن ، معین علی اور ڈوین براوو نے ایک ایک کامیابی حاصل کی۔