دبئی، 20 ستمبر (انڈیا نیرٹیو)

 انٹرنیشنل کرکٹ کونسل (آئی سی سی) نے کھیل کے کئی قوانین میں تبدیلیوں کا اعلان کیا ہے۔ تبدیل شدہ قوانین یکم اکتوبر 2022 سے نافذ العمل ہوں گے۔

چیف ایگزیکٹیو کمیٹی (سی ای سی) کی جانب سے سورو گنگولی کی زیرقیادت مینز کرکٹ کمیٹی کی سفارشات کی توثیق کے بعد قوانین میں تبدیلی کی گئی ہے۔

اس موقع پر بات کرتے ہوئے سورو گنگولی نے کہا ”آئی سی سی کرکٹ کمیٹی کے پہلے اجلاس کی صدارت کرنا میرے لیے اعزاز کی بات ہے۔

میں کمیٹی کے ارکان کے تعاون سے خوش ہوا جس کے نتیجے میں اہم سفارشات سامنے آئیں۔ میں تمام ممبران کا ان کے قیمتی ان پٹ اور مشوروں کے لیے شکریہ ادا کرتا ہوں“۔

نئے قوانین درج ذیل ہیں

 کیچ آؤٹ ہونے پر نیا بلے باز  ہی کر گا بلے بازی

آئی سی سی کے نئے قوانین کے مطابق کیچ آؤٹ ہونے پر نیا بلے باز ہی بیٹنگ کرے گا، پرانے اصول کے مطابق اگر کیچ کے دوران کریزتبدیل ہو جاتی تھی تو نان اسٹرائیکر بیٹسمین  بلے بازی کرتا تھاجب کہ نیا بلے باز بولنگ اینڈ پرہوتاتھا۔

گیند کو پالش کرنے کے لیے رال کے استعمال پر مستقل پابندی

ساتھ ہی گیند کو پالش کرنے کے لیے سلائیوا(رال) کے استعمال پر بھی مستقل پابندی عائد کر دی گئی ہے۔ اس سے قبل یہ پابندی کووڈ کی وجہ سے دو سال سے زیادہ کے لیے بین الاقوامی کرکٹ میں عارضی طور پر لگائی گئی تھی۔

بلے باز کے پاس اسٹرائیک کے لیے 2 منٹ

بیٹنگ کے لیے آنے والے بلے باز کو اب ٹیسٹ اور ون ڈے میں دو منٹ کے اندر اسٹرائیک لینے کے لیے تیار رہنا ہوگا جب کہ ٹی۔20 انٹرنیشنل کرکٹ میں 90 سیکنڈ کی موجودہ حد برقرار رکھی گئی ہے۔

گیند کوکھیلنے کا بلے باز کا حق

اگر کوئی گیند پچ سے دورگرتی ہے تو نئے اصول کے تحت اس گیند پر شاٹ کھیلنے کی بھی اجازت ہوگی لیکن اس دوران بلے باز کا بیٹ یا اس کے جسم کا کچھ حصہ پچ کے اندر رہنا چاہیے۔

اگر وہ اس اسے آگے آتا ہے تو  امپائر اسے ڈیڈ بال کے لئے کال کریں گے۔ کوئی بھی گیند جس پر بلے باز پچ چھوڑ کر شاٹ کھیلنے پر مجبور  ہوگا،اسے نو بال دیا جائے گا۔

کھلاڑی کے غلط طریقے سے موومنٹ کرنے پر سزا کی تجویز

اگر فیلڈنگ کرنے والا کوئی کھلاڑی غلط طریقے سے موومنٹ کرتا ہے تو اسے ابھی ڈیڈ بال قرار دے دیا جاتا ہے اور بلے باز کا شاٹ منسوخ کر دیا جاتا ہے۔

اب اس میں تبدیلی کی جا رہی ہے۔ اگر کھلاڑی جان بوجھ کر یہ حرکت کرتا ہے  تو بلے باز کو پنالٹی کے طور پر پانچ رن دیے جائیں گے۔

کچھ دوسرے بڑے فیصلے

جنوری 2022میں ٹی۔20انٹر نیشنل میں شروع کی گئی ان میچ پنالٹیز(جس کے تحت کوئی فیلڈنگ ٹیم مقررہ وقت تک اپنے اوورز کرانے میں ناکام رہتی ہے، تو ایک ایکسٹرا فیلڈر کو فیلڈنگ سرکل کے اندر لایا جاتا ہے)،  اب 2023 میں آئی سی سی مینز کرکٹ ورلڈ کپ سپر لیگ کی تکمیل کے بعداسے ون ڈے میں اپنایا جائے گا۔

یہ بھی فیصلہ کیا گیا کہ تمام مردوں اور خواتین کے ون ڈے اور ٹی۔20 میچز کے لیے کھیل کی شرائط میں ترمیم کی جائے گی تاکہ دونوں ٹیموں کی جانب سے اتفاق ہونے پر ہائبرڈ پچز کا استعمال کیا جا سکے۔

فی الحال، ہائبرڈ پچز صرف خواتین کے ٹی۔20 انٹرنیشنلز میں استعمال کی جا سکتی ہیں۔

آئی سی سی کرکٹ کمیٹی میں شامل ارکان درج ذیل ہیں

سورو گنگولی (چیئرمین)؛ رمیز راجہ (آبزرور)؛ مہیلا جے وردھنے اور راجر ہارپر (سابق کھلاڑی)؛ ڈینیل ویٹوری اور وی وی ایس لکشمن (موجودہ کھلاڑیوں کے نمائندے)؛ گیری اسٹیڈ (رکن ٹیم کوچ نمائندہ)؛ جے شاہ (مکمل ممبر نمائندہ)؛ جوئل ولسن (امپائر نمائندہ)؛ رنجن مدوگلے (آئی سی سی چیف ریفری)؛ جیمی کاکس (ایم سی سی نمائندہ)؛کائل کوئٹزر (ایسوسی ایٹ نمائندہ)؛ شان پولاک (میڈیا نمائندہ)؛گریگ بارکلے  اورجیوف الارڈیس (آنریری- آئی سی سی  صدر اور چیف ایگزیکٹو)؛ کلائیو ہچکاک (کمیٹی سکریٹری)؛ ڈیوڈ کینڈکس (شماریات دان)۔