ساؤتھیمپٹن، 8 جولائی (انڈیا نیرٹیو)
ہاردک پانڈیا کی آل راؤنڈ کارکردگی (51 رن، 4 وکٹیں) کی مدد سے ہندوستان نے پہلے ٹی-20 میں انگلینڈ کو 50 رن سے شکست دی۔ اس جیت کے ساتھ ہی ہندوستان نے 3 ٹی-20 میچوں کی سیریز میں 1-0 کی برتری حاصل کر لی ہے۔
ہندوستانی ٹیم کی تیز شروعات
اس میچ میں ہندوستانی کپتان روہت شرما نے ٹاس جیت کر پہلے بلے بازی کرنے کا فیصلہ لیا۔ روہت شرما اور ایشان کشن نے ہندوستان کو تیز شروعات دلائی۔ خاص طور پر روہت کچھ زیادہ ہی جارحانہ تھے۔ معین علی نے تیسرے اوور میں روہت کو 29 کے مجموعی اسکور پر آؤٹ کر کے بھارت کو پہلا جھٹکا دیا۔ روہت نے 14 گیندوں میں 5 چوکوں کی مدد سے 24 رنوں کی تیز اننگز کھیلی۔ اس کے بعد معین نے ایشان کشن (8) کو آؤٹ کر کے بھارت کو دوسرا جھٹکا بھی دیا۔ بھارت نے 5 اوور میں 46 رن پر 2 وکٹ گنوا دیے۔
دیپک ہڈا اور سوریہ کمار یادو نے ہندوستانی اننگ کو سنبھالا
یہاں سے دیپک ہڈا اور سوریہ کمار یادو نے ہندوستانی اننگ کو سنبھالا۔ دونوں نے تیسری وکٹ کے لیے 43 رنوں کی شراکت قائم کی۔ 9ویں اوور میں ہڈا کو کرس جارڈن نے 89 کے مجموعی اسکور پر پویلین بھیجا۔ ہڈا نے 17 گیندوں میں تین چوکوں اور دو چھکوں کی مدد سے 33 رن بنائے۔ سوریہ کمار 12ویں اوور میں 126 کے مجموعی اسکور پر جارڈن کا دوسرا شکار بنے۔ سوریہ نے 19 گیندوں میں 4 چوکوں اور 2 چھکوں کی مدد سے 39 رن بنائے۔
ہاردک پانڈیا کی نصف سنچری
اس کے بعد ہاردک پانڈیا نے اکشر پٹیل کے ساتھ مل کر ہندوستانی اننگز کو آگے بڑھایا۔ 17ویں اوور میں اکشر 171 کے مجموعی اسکور پر 17 رن بنانے کے بعد پارکنسن کا شکار بنے۔ اس کے بعد ہاردک نے اپنی نصف سنچری مکمل کی۔ تاہم اگلے ہی اوور میں ٹاپلے نے انہیں آؤٹ کر کے بھارت کو چھٹا جھٹکا دیا۔ ہاردک نے 33 گیندوں میں 6 چوکوں اور 1 چھکے کی مدد سے 51 رن بنائے۔ اس کے بعد ہندوستان نے 195 کے مجموعی اسکور پر دنیش کارتک (11) اور ہرشل پٹیل (3) کی وکٹیں گنوا دیں۔ بھونیشور کمار 1 اور ارشدیپ سنگھ 2 رن بنا کر ناٹ آؤٹ رہے۔ بھارت نے مقررہ 20 اوور میں 8 وکٹوں پر 198 رن بنائے۔انگلینڈ کی جانب سے کرس جارڈن اور معین علی نے 2-2 اور آر ٹاپلے، ٹائیمل ملس اور میتھیو پارکنسن نے 1-1 وکٹ حاصل کی۔
انگلینڈ کی خراب شروعات، ہاردک اور بھونیشور نے دئے ابتدائی جھٹکے
199 رنوں کے ہدف کا تعاقب کرنے اتری انگلش ٹیم کی شروعات خراب رہی اور بھونیشور نے پہلے اوور میں 1 رن کے مجموعی اسکور پر جوس بٹلر (00) کو بولڈ کر کے انگلینڈ کو پہلا جھٹکا دیا۔ ہاردک نے 5ویں اوور میں 27 کے مجموعی اسکور پر جیسن رائے (04) کو آؤٹ کر کے انگلینڈ کو دوسرا جھٹکا دیا۔ اس کے بعد انگلینڈ کی وکٹیں وقفے وقفے سے گرتی رہیں اور پوری ٹیم 19.3 اوور میں 148 رن پر ڈھیر ہو گئی۔ انگلینڈ کی جانب سے معین علی نے 36، ہیری بروک نے 28، کرس جارڈن نے 26 اور ڈیوڈ ملان نے 21 رن بنائے۔بھارت کی جانب سے ہاردک پانڈیا نے 4، ارشدیپ سنگھ اور یوزویندر چہل نے 2-2 اور بھونیشور کمار اور ہرشل پٹیل نے 1-1 وکٹ حاصل کی۔
