ہندوستانی جونیئر خواتین ہاکی ٹیم نے تاریخ رقم کردی۔ ٹیم نے پہلی بار ایشیا کپ کا ٹائٹل جیتا ہے۔ خواتین کی ٹیم نے اتوار کو جاپان کے کاکامیگاہارا میں کھیلے گئے خواتین جونیئر ایشیا کپ 2023 کے فائنل میچ میں 4 بار کی چمپئن جنوبی کوریا کو 2-1 سے شکست دی۔ ہندوستان کی جانب سے انو ( 22ویں منٹ) اور نیلم ( 41ویں منٹ) نے گول کئے۔
دوسری جانب مخالف ٹیم کی جانب سے واحد گول زیون پارک ( 25ویں منٹ) نے کیا۔ اس کے ساتھ، ہندوستانی ٹیم نے چلی میں کھیلے جانے والے ایف آئی ایچ خواتین کے جونیئر ورلڈ کپ 2023 میں اپنی جگہ پختہ کر دی۔فائنل میچ کی بات کریں تو کھیل کے پہلے 20 منٹ میں کوئی گول نہیں ہو سکا۔ ہندوستان کی انو نے 22ویں منٹ میں گول کر کے ٹیم کو 1-0 کی برتری دلا دی۔ تاہم ہندوستانی ٹیم کی برتری زیادہ دیر قائم نہ رہ سکی۔ کوریا کی جانب سے سیون پارک نے 25ویں منٹ میں گول کر کے سکور 1-1 سے برابر کر دیا۔
دوسرے ہاف میں 41ویں منٹ میں نیلم نے گول کر کے ہندوستان کو 2-1 کی برتری دلا دی۔ کھیل کے اختتام پر بھارت کو 2-1 کی برتری حاصل تھی اور اس نے میچ جیت لیا۔ اس کے ساتھ ہی خواتین کی ٹیم ایشیا چمپئن بن گئی۔ یہ ٹورنامنٹ کا 8 واں سیزن ہے۔ بھارت یہ ٹائٹل جیتنے والا تیسرا ملک ہے۔ جنوبی کوریا 4 بار ، چین 3 بار ٹورنامنٹ جیت چکا ہے۔ اس بار یہ ٹورنامنٹ 3 سے 11 جون تک کھیلا گیا۔
کھلاڑیوں کے لیے انعامات کا اعلان
ایشیا کپ جیتنے پر ہاکی انڈیا کے ایگزیکٹو بورڈ نے ہر کھلاڑی کے لیے 2 لاکھ روپے کے نقد انعام کا اعلان کیا۔ جبکہ معاون عملہ کو تعریفی ٹوکن کے طور پر ایک لاکھ روپے ملیں گے۔ ہاکی انڈیا کے صدر ڈاکٹر دلیپ ٹرکی نے ہندوستانی جونیئر خواتین ٹیم کو ان کی شاندار کامیابی پر مبارکباد دی۔
ایک بیان میں ٹرکی نے کہا کہ ہم بے پناہ فخر سے لبریز ہیں۔ ہندوستانی جونیئر خواتین ٹیم نے اپنا پہلا جونیئر ایشیا کپ جیت لیا ہے۔ ان کی صلاحیتوں اور عزم کا غیر معمولی مظاہرہ واقعی امید افزا رہا ہے۔ اس فتح نے ان کی پوزیشن مضبوط کر دی ہے۔ مجھے یقین ہے کہ یہ اس سال کے آخر میں جونیئر ورلڈ کپ میں ان کے آنے والے چیلنج کے لیے ایک مضبوط بنیاد کا کام کرے گا۔انہوں نے کہا کہ ان کی شاندار کامیابی کو تسلیم کرنے کے لیے ہاکی انڈیا نے کھلاڑیوں کو نقد انعامات دینے کا فیصلہ کیا ہے۔ قوم کا نام روشن کرنے میں ان کی انتھک کوششوں کے لیے میں ٹیم اور سرشار معاون عملے کو تہہ دل سے مبارکباد پیش کرتا ہوں۔
