نئی دہلی، 24 مئی

 چنئی کے ایم اے چدمبرم (چیپک)اسٹیڈیم میں چنئی سپر کنگز (سی ایس کے) اور گجرات ٹائٹنز کے درمیان کھیلے گئے کوالیفائر 1 میچ کو آئی پی ایل کے ڈیجیٹل اسٹریمنگ پارٹنر جیو سنیما پر ریکارڈ ناظرین کی تعدادنے دیکھا۔ اس میچ میں مہندر سنگھ دھونی کی کپتانی میں سی ایس کے  نے ہاردک پانڈیا کی قیادت والی  گجرات ٹائٹنز کو 15 رنوں سے شکست دی۔ ڈیجیٹل میڈیم کے ذریعے آئی پی ایل 2023 کو نشر کر رہے جیو سنیمانے  اس میچ کے ساتھ ماضی کے تمام ریکارڈ توڑ ڈالے۔

کوالیفائر-1 کے ہائی وولٹیج میچ کے دوران ریکارڈ 2.50 کروڑ لوگوں نے بیک وقت لائیو میچ کا لطف اٹھایا۔ جیو سنیما کی تاریخ میں یہ کسی بھی میچ کا لائیو ٹیلی کاسٹ دیکھنے کا سب سے زیادہ ریکارڈ ہے۔ اس میچ نے ایک ماہ پرانے آئی پی ایل میچ کے دوران بنایا گیا ریکارڈ توڑ دیا ہے۔ 17 اپریل کو مہندر سنگھ دھونی کی ٹیم سی ایس کے  کا رائل چیلنجرز بنگلور کے ساتھ میچ تھا۔ اس میچ کے دوران 2.40 کروڑ لوگوں نے جیو سنیما پر ایک ساتھ آئی پی ایل کا لائیو میچ دیکھا۔ اب کوالیفائر-1 کے دوران 2.50 کروڑ کا سب سے بڑا ریکارڈ سامنے آیا ہے۔

قابل ذکر ہے کہ منگل کی رات کھیلے گئے کوالیفائر-1 میچ میں گجرات ٹائٹنز کے کپتان ہاردک پانڈیا نے ٹاس جیت کر پہلے گیند بازی کرنے کا فیصلہ کیا۔ چنئی سپر کنگز نے پہلے  بلے بازی کی۔ ٹیم نے مقررہ 20 اوورز میں سات وکٹوں کے نقصان پر 172 رن بنائے۔

 جواب میں گجرات کی ٹیم 20 اوورز میں 157 رنز پر آل آؤٹ ہوگئی۔ گجرات میچ 15 رنوں سے ہار گیا۔ اس کے ساتھ ہی مہندر سنگھ دھونی کی ٹیم ریکارڈ 10ویں بار آئی پی ایل کے فائنل میں پہنچی۔ چنئی سے اس شکست کے بعد بھی پانڈیا کی ٹیم گجرات کو فائنل میں جانے کا موقع ملے گا۔

 ممبئی انڈینز اور لکھنؤ سپر جائنٹس کے درمیان ایلیمینیٹر میں جیتنے والی ٹیم کوالیفائر 2 میں گجرات سے کھیلے گی۔ آئی پی ایل کا فائنل 28 مئی کو احمد آباد میں کھیلا جائے گا۔