نئی دہلی،19ستمبر (انڈیا نیرٹیو)

پاکستان کے سابق بلے باز واجد خان، دیگر کھلاڑیوں کی طرح، نیوزی لینڈ کا دورہ پاکستان منسوخ کرنے کے فیصلے سے شدید  دکھی ہیں اور اس بارے میں کھل کر بات کی۔ واجدنے کہا کہ نیوزی لینڈ نے پاکستان پر بالکل بھروسہ نہیں کیا جو کہ مستقبل کے لیے خطرناک ہے اور یہ آنے والے دنوں میں دونوں ممالک کے تعلقات کو بھی متاثر کر سکتا ہے۔ نیوزی لینڈ کرکٹ بورڈ نے پاکستان کے خلاف راولپنڈی میں پہلے ون ڈے سے قبل سیکورٹی وجوہات کی بنا پر دورہ منسوخ کردیا۔

دراصل، نیوزی لینڈ کرکٹ بورڈ پاکستان میں سیکورٹی انتظامات کے بارے میں فکر مند تھا، اگرچہ پاکستان کرکٹ بورڈ اور حکومت پاکستان نے انہیں یقین دلانے کی کوشش کی، لیکن یہ کوشش ناکام ہو گئی۔ اس دورے کی منسوخی کے بعد پاکستانی کرکٹ دنیا میں رد عمل کا ایک دور  جاری ہے۔ انہوں نے کہا، 'میں اس میچ کے کمنٹری پینل میں تھا اور اس سے قبل پری میچ شو کے دوران ہمیں یہ معلومات ملی کہ نیوزی لینڈ کی ٹیم ابھی تک اسٹیڈیم نہیں پہنچی ہے۔

انہوں نے بتایا، 'ہمیں ابتدائی طور پر یہ خبر ملی کہ شاید ان کی ٹیم کے کچھ کھلاڑی کووڈ 19 سے متاثر ہیں، اس لیے ٹیم نے ہوٹل نہیں چھوڑا۔ لیکن پھر کچھ عرصہ بعد پتہ چلا کہ نیوزی لینڈ سیکورٹی وجوہات کی وجہ سے پریشان ہے۔ یہ سب سن کر ہم سب بہت پریشان ہوئے، کیونکہ اگر کووڈ 19 کی وجہ سے تاخیر ہوئی تو دو تین دن کے بعد سیریز دوبارہ شروع ہونے کا امکان تھا۔ نیوزی لینڈ کا دورہ پاکستان منسوخ ہونے کے بعد اب اگلے ماہ مجوزہ انگلینڈ دورہ پاکستان بھی خطرے میں ہے کیونکہ انگلینڈ بھی سیکورٹی وجوہات سے پریشان ہے۔