کوہلی  کی زبر دست بلے بازی

ٹی ٹوئنٹی ورلڈ کپ کے اپنے پہلے میچ میں بھارت نے پاکستانی ٹیم کو چار وکٹوں سے شکست دے دی۔ اس سنسنی خیز میچ میں پاکستان نے بھارت کو 160 رن کا ہدف دیا تھا۔

جواب میں بھارتی ٹیم نے سابق کپتان وراٹ کوہلی کی 53 گیندوں پر 82 رن کی نا ٹ آؤٹ  اننگ کی بنیاد پر چھ وکٹ پر 160 رن بنا کر میچ جیت لیا۔ کوہلی نے اپنی اننگ میں چھ چوکے اور چار چھکے لگائے۔

کوہلی کے علاوہ آل راؤنڈر ہاردک پانڈیا نے بھی    تین وکٹیں حاصل کیں، پھر بعد میں 40 رن کی شاندار اننگ کھیلی۔

میلبورن میں کھیلے گئے اس میچ میں 160 رن کے ہدف کے تعاقب میں ہندوستانی ٹیم کی شروعات اچھی نہیں رہی۔ ٹیم کو پہلا جھٹکا دوسرے اوور میں کے ایل راہل کی شکل میں لگا۔

راہل صرف چار رن بنا سکے۔ اس کے بعد ہندوستان کو چوتھے اوور میں کپتان روہت شرما کی صورت میں دوسرا جھٹکا لگا۔ کپتان روہت بھی صرف چار رن بنا سکے۔ اس کے بعد سوریہ کمار یادو بھی 15 رن بنانے کے بعد آؤٹ ہوئے۔

ساتھ ہی اکشر پٹیل بھی دو رن بنانے کے بعد رن آؤٹ ہو گئے۔ وراٹ کوہلی اور ہاردک پانڈیا نے یہاں سے ہندوستانی اننگ کو سنبھالا۔ دونوں نے مل کر آہستہ آہستہ اسکور بورڈ کو آگے بڑھایا۔

ٹیم کے اسکور کو 10 اوور میں 50 کے قریب لے گئے۔ یہاں رن ریٹ بڑھتا دیکھ کر دونوں بلے بازوں نے ہاتھ کھولے اور کچھ بڑے شاٹس مارنے لگے۔ دونوں بلے بازوں نے 15 اوورز میں ٹیم کا اسکور 100 رن سے آگے بڑھایا۔

اس دوران وراٹ کوہلی نے اپنی نصف سنچری مکمل کی۔ آخری تین اووروں میں بھارت کو جیت کے لیے 48 رن درکار تھے۔ ہندوستانی ٹیم نے کوہلی کے تین چوکوں کی بدولت 18ویں اوور میں 17 رن بنائے۔ اس کے بعد کوہلی نے 19ویں اوور کی آخری دو گیندوں پر دو چھکے لگائے۔

آخری اوور میں بھارت کو جیت کے لیے 16 رن درکار تھے۔ محمد نواز بولنگ کرنے آئے اور ہاردک پانڈیا پہلی ہی گیند پر آؤٹ ہو گئے۔ ہاردک 37 گیندوں میں 40 رن بنا سکے۔ اس کے بعد کوہلی نے چوتھی گیند پر چھکا لگایا جسے امپائر نے اونچائی کی وجہ سے نو بال دے دیا۔