آئی سی سی ٹی 20 ورلڈ کپ میں پاکستان کی جانب سے 10 وکٹوں سے شکست کے بعد بھارتی فاسٹ بالر محمد شامی کو آن لائن بد زبانی کا نشانہ بنایا گیا۔ جیسے ہی اتوار کو بھارت ہار گیا مداحوں نے انسٹاگرام اور ٹوئٹر پر محمد شامی پر توہین آمیز تبصرے شروع کردیے۔ایک صارف نے لکھا، "ٹیم انڈیا میں پاکستانی۔" دوسرے نے لکھا، "ایک مسلمان پاکستان کے حق میں۔ کتنے پیسے ملے؟ "
محمد شامی کے خلاف اس طرح کے اور بھی بے ہودہ تبصرے کیے گئے ہیں جو یہاں تحریر کرنے کے قابل نہیں ہیں۔ تاہم شامی کا دفاع کرنے والے بہت سے لوگ سامنے آئے۔شامی کے خلاف کئی توہین آمیز تبصرے کے بعد ہندوستان کے سابق اوپنر وریندر سہواگ ٹیم انڈیا کے اس تیز گیند باز کی حمایت میں سامنے آئے ہیں اور انہوں نے ان پر گھٹیا تبصرہ کرنے والوں کو کرارا جواب دیا ہے۔
سہواگ نے اپنے ٹویٹر پر لکھا، 'محمد شامی پر آن لائن حملہ کافی چونکا دینے والا ہے، ہم ان کے ساتھ کھڑے ہیں۔ وہ ایک چمپئن ہیں اور ہر کھلاڑی جو انڈین ٹوپی پہنتا ہے اس کے دل میں آن لائن بھیڑ سے زیادہ ہندوستان بستا ہے۔ میں تمہارے ساتھ ہوں شامی۔ اگلے میچ میں دکھادو جلوہ۔ پاکستان کے خلاف کھیلے گئے میچ میں شامی نے گیند سے اچھی کارکردگی نہیں کی اور انہوں نے اپنے 3.5 اوورز میں بغیر کوئی وکٹ لیے 43 رنز دیے۔ تاہم، نہ صرف شامی، بلکہ ٹیم انڈیا کے دیگر گیندباز کو بھی بابر اعظم اور محمد رضوان نے زبردست طریقے سے کھیلا ۔ لیکن ہندوستان کی شکست کے بعد کچھ لوگوں نے محمد شامی کو تنقید کا نشانہ بناتے ہوئے نا زیبا تبصرے کئے جس کے خلاف سہواگ کے علاوہ دیگر شخصیات نے بھی شامی کی حمایت کی اور تنقید کرنے والوں کو کھری کھوٹی سنائی۔
آپ کوبتا دیں کہ محمد رضوان اور کپتان بابر اعظم کی شاندار اننگز کی بدولت پاکستان نے اتوار کو دبئی انٹرنیشنل کرکٹ اسٹیڈیم میں بھارت کو 10 وکٹوں سے شکست دے دی۔
رضوان (ناٹ آؤٹ 79) اور بابر (ناٹ آؤٹ 68) نے ہندوستان کے بولرز کو کوئی موقع نہیں دیا اور دونوں بلے بازوں کی عمدہ بیٹنگ کی بدولت پاکستان نے بغیر کسی وکٹ کے 152 رنز کے ہدف کو باآسانی پورا کرلیا۔ یہ پہلا موقع ہے کہ بھارت نے ٹی 20 میچ میں دس وکٹوں سے شکست کھائی ہے۔ اتفاق سے یہ بھی پہلا موقع ہے کہ پاکستان نے کوئی T20میچ دس وکٹوں سے جیتا ہے۔بھارت کا مقابلہ نیوزی لینڈ سے اتوار 31 اکتوبر کو ہوگا جبکہ پاکستان کا مقابلہ نیوزی لینڈ سے منگل 26 اکتوبر کو ہوگا۔
