نئی دہلی، 26 اپریل (انڈیا نیرٹیو)

دنیا کے امیر ترین شخص ایلن مسک نے بالآخر سوشل میڈیا سائٹ ٹوئٹر کو خرید لیا۔ ایلن مسک نے ٹویٹر کو 44 بلین امریکی ڈالر میں خریدا ہے۔ اس سے قبل ٹوئٹر بورڈ نے ایلن مسک کی پیشکش قبول کر لی تھی۔ کمپنی نے کل دیر رات یہ معلومات  دی۔

ٹویٹر انک نے بتایا کہ یہ معاہدہ الیکٹرک کار کمپنی ٹیسلا کے چیف ایگزیکٹو آفیسر (سی ای او) ایلن مسک کے ساتھ 44 ارب امریکی ڈالر (تقریباً 3368 ارب روپے) میں کیا گیا ہے۔ ٹویٹر نے ٹویٹ کر کہا کہ حصول کا عمل مکمل ہونے کے بعد یہ نجی ملکیت کی کمپنی بن جائے گی۔ ٹویٹر نے اس سودے کا اعلان شیئر ہولڈرس کو لین دین کی سفارش کرنے کی بورڈ کی میٹنگ کے بعد کیا۔

امریکی مقبول ترین سوشل نیٹ ورکنگ سائٹ  کی ویب سائٹ ٹوئٹر کو خریدنے کا معاہدہ طے پا جانے کے بعد ایلن مسک نے ٹویٹ کیا کہ مجھے امید ہے کہ میرے بدترین ناقدین بھی ٹوئٹر پر بنے  رہیں گے کیونکہ آزادی اظہار کا یہی مطلب ہے۔ اس سے قبل میڈیا میں ایسی خبریں آئی تھیں کہ ٹوئٹر 54.20 ڈالر فی شیئر کی قیمت پر ایلن مسک کے ہاتھ میں جا سکتا ہے۔

قابل ذکر ہے کہ ٹیسلا کے سی ای او ایلن مسک نے رواں ماہ ٹوئٹر کے 9.2 فیصد حصہ دارییعنی تقریباً 73.5 کروڑشیئرس خریدے تھے، جس سے وہ سوشل میڈیا کمپنی کے سب سے بڑے شیئر ہولڈر بن گئے۔ اس کے بعد ایلن مسک نے ٹوئٹر کو ایک خط بھیج کر کمپنی کے باقی شیئرس خریدنے کی پیشکش کی  تھی۔ انہوں  نے ٹویٹر انک کے ہر شیئر کے لیے 54.20 ڈالر کی پیشکش کی ہے۔