حیدرآباد، 14مئی (انڈیا نیرٹیو)

سن رائزرز حیدرآباد (ایس آر ایچ) کی ٹیم نوجوان فاسٹ بولر عمران ملک کو موقع نہیں دے رہی ہے۔ عمران ملک کو لکھنؤ سپر جائنٹس (ایل ایس جی) کے خلاف میچ کے لیے پلیئنگ الیون میں شامل نہیں کیا گیا تھا۔

ٹیم انڈیا کے سابق آل راؤنڈر عرفان پٹھان اس سے خوش نہیں ہیں۔ انہوں نے عمران ملک کے حوالے سے بڑا ردعمل دیا ہے۔ انہوں نے کہا کہ سن رائزرز حیدرآباد کی انتظامیہ نے عمران ملک کو ٹھیک سے ہینڈل نہیں کیا اور انہیں باہر بٹھا دیا۔

آئی پی ایل کا یہ سیزن عمران ملک کے لیے اچھا نہیں رہا۔ اس سیزن میں عمران نے اب تک 7 میچ کھیلے ہیں اور 10.35 کے ہائی اکانومی ریٹ کے ساتھ صرف 5 وکٹیں حاصل کی ہیں۔ ان کی رفتار میں بھی کمی دیکھی گئی ہے اور شاید یہی وجہ ہے کہ سن رائزرس حیدرآباد کی ٹیم نے انہیں پلیئنگ الیون سے ڈراپ کر دیا۔

عرفان پٹھان نے عمران ملک کے بارے میں ٹویٹ کیا۔حالانکہ عرفان پٹھان کا ماننا ہے کہ ٹیم انتظامیہ نے عمران کو اچھی طرح سے ہینڈل نہیں کیا۔ انہوں نے ٹویٹ کیا کہ لیگ کا سب سے تیز گیند باز باہر بیٹھا ہوا ہے۔ عمران ملک کو ان کی ٹیم نے اچھی طرح سے ہینڈل نہیں کیا۔

آپ کو بتاتے چلیں کہ عمران ملک نے گزشتہ آئی پی ایل سیزن میں اپنی رفتار کے بل بوتے پر کافی کامیابیاں حاصل کی تھیں اور وہ ایک مقبول بولر بھی بن گئے تھے۔ اسی وجہ سے انہیں ہندوستانی ٹیم میں بھی جگہ ملی تھی۔تاہم وہ اس رفتار کو مسلسل برقرار نہیں رکھ سکے اور یہ سیزن ان کے لیے اتنا اچھا نہیں رہا۔