دنیا بھر میں مشہور شہرہ آفاق سیاحتی مقام گلمرگ میں جموں وکشمیر کی تاریخ میں جموں وکشمیر یوٹی کا سب سے اونچا قومی پرچم نصب کیاگیا۔ اس قومی پرچم کی اونچائی سو فٹ لمبا ہے۔یہ کام گلمرگ میں تعینات انڈین آرمی کی جانب سے کیاگیا۔ اس قومی پرچم کا افتتاح مہمان خصوصی جنرل کمانڈنگ ان چیف ناردرن کمانڈ کے لیفٹیننٹ جنرل وائی کے جوشی نے کیا۔ اس موقع پر جموں وکشمیر کے سابق فوجی مہمان ذی وقار کی حیثیت سے موجود رہے۔ افتتاحی تقریب پر سیول انتظامیہ کے اعلی افسران،جموں وکشمیر پولیس نارتھ کشمیر ڈی آئی جی اور فوج کے دیگر اعلیٰ افسران بھی موجود رہے۔ تقریب میں جموں وکشمیر کے سابق فوجیوں کو اعزازات سے نوازا گیا۔

اس موقع پر مقامی نوجوانوں نے کافی تعداد میں شرکت کی ۔پرچم کشائی پران نوجوانوں نے خوشی کا اظہار کیا۔ سماجی کارکن ایڈوکیٹ حامد نے نیوز18اردو سے بات کرتے ہوئے کہا کہ گزشتہ ستہر سالوں سے یہاں کے سیاست دانوں نے حالات کو انتہائی خراب کرکے رکھ دئیے تھے۔یہاں کے نوجوانوں کو ملی ٹینسی کی جانب دھکیل دیا۔ انہوں نے کہاکہ آج کادن کشمیریوں کے لئے خوشی کادن ہے۔سماجی کارکن عابد سلام نے قومی پرچم کشائی پر خوشی کا اظہار کیا انہوں نے کہاکہ سیاحوں کو یہاں زیادہ سے زیادہ آنا چاہے۔

کشمیر میں فوج کی طرف سے ایسا قدم دفعہ تین سو ستہر کی منسوخی کے بعد اٹھایا گیا۔ یہاں کے نوجوان نےاس اقدام کی ستائش کی اور انہوں نے سیاحوں کو کشمیر آنے کی دعوت دی ۔افتتاحی تقریب پر جنرل کمانڈنگ ان چیف ناردرن کمانڈ کے لیفٹیننٹ جنرل وائی کے جوشی نے کہاکہ کشمیر اب بدل رہاہے یہاں کے لوگوں کے ذہن بھی تبدیل ہورہے ہیں ۔ انہوں نے دنیا میں اگر کہی پر جنت ہے وہ کشمیر ہے۔انہوں نے کشمیری نوجوانوں کی بھی تعریف کی۔تقریب میں اسکول بچوں نے بھی شرکت کی ۔ا ن بچوں نے قومی پرچم کے مناظر دیکھ کر خوشی کا اظہار کیا۔ ایک طالبہ نے کہاکہ آج انہیں کافی خوشی ہوئی۔کیونکہ پرچم کشائی کے ساتھ ساتھ فوج کے اعلی افسران کے ساتھ بھی تبادلہ خیال کیا۔ جس سے انہیں سیکھنے کاموقع ملا۔رواں سال کے اپریل کے مہینے میں اس قومی پرچم کو نصب کرنے کے لیے کام شروع کیاگیاتھا۔

اس کام کی نگرانی فوج کے اعلی افسران کررہے تھے۔گلمرگ میں یہ قومی پرچم اس جگہ نصب کیاگیا۔جہاں گلمرگ گنڈولہ سے لیکر آس پاس کے تمام اونچے پہاڑوں سے سیاحوں کی نظر اس قومی پرچم پر پڑے گی۔ اس قومی پرچم کے نصب کرنے سے سیاحت کو بھی کافی فائدہ ہوگا۔ اور سیاحوں کے لئے توجہ کا مرکز بن جائے گا۔