<div class="col-lg-4 col-md-4 col-sm-4 col-xs-12"></div>
<div class="col-lg-12 col-md-12 col-sm-12 col-xs-12">
<h3>محمود کے 88 ویں یوم پیدائش پر جانی لیور نے انہیں کیا یاد ، بلیک اینڈ وہائٹ تصویر شیئر کی</h3>
ہندوستانی فلم انڈسٹری میں جن لوگوں نے اپنی فنکاری سے دلوں پر راج کیا ہے ان میں محمود کا نام بہت اہم ہے. محمود نے اپنی زبردست اداکاری سے وہ مقام حاصل کیا جس پے آج بھی رشک کیا جاتا ہے. سنجیدہ اداکاری ہو یا کامیڈی دونوں میں محمود کا کوئی جواب نہیں تھا. وہ فلم اداکار ہونے کے ساتھ ساتھ ایک بہت اچھے انسان بھی تھے. فلم انڈسٹری میں سبھی انکا احترام کرتے تھے.
<div>مشہور مزاح نگار ، پروڈیوسر اور ہدایتکار محمود کاآج 88 واں یوم پیدائش ہے۔ 29 ستمبر 1932 کو پیدا ہوئے محمود ہندوستانی سنیماکا ایسا نام ہے جنہوں نے اپنی عمدہ اداکاری سے سامعین کے دلوں پر انمٹ نقوش چھوڑے ہیں ۔ جب بھی فلموں میں کامیڈینس کی بات ہوتی ہے تو سب سے پہلے ان ہی کا چہرہ ابھرتا ہے۔ آج ان کے یوم پیدائش کے موقع پر کامیڈین جانی لیور نے سوشل میڈیا پر ان کو یاد کرتے ہوئے ان کی ایک بلیک اینڈ وہائٹ تصویر شیئر کی ہے۔ ٹویٹر پر اس تصویر کو شیئر کرتے وقت جانی لیور نے لکھا – 'لو یو بھائی جان ! آپ کبھی نہیں بھولیں گے! سالگرہ مبارک محمود بھائیجان۔ '</div>
<div>مداح جانی لیور کی پوسٹ پر اپنا رد عمل دے رہے ہیں اور انہیںیا د کر رہے ہیں۔ لاکھوں دلوں کو جیتنے والے ، محمود نے فلموں میں ہر کردار کو بخوبی نبھایا ، لیکن فلموں میں ان کے ذریعہ ادا کیے گئے مزاحیہ کرداروں کو ناظرین میں خوب پذیرائی ملی۔ 29 ستمبر 1932 کو پیدا ہوئے ، محمود کے والد ممتاز علی ایک فلمی اداکار اور ڈانسر تھے۔ محمود ، جو آٹھ بہن بھائیوں میں دوسرے نمبر پر تھے ، نے 1943 میں ریلیز ہونے والی فلم ’قسمت‘ سے بطور چائلڈ آرٹسٹ اپنے کیریئر کا آغاز کیا۔ اس فلم میں انہیں اشوک کمار اور ممتاز شانتی کے ساتھ کام کرنے کا موقع ملا۔ اس فلم میں محمود کی اداکاری کو خوب پذیرائی ملی۔ اس کے بعد ، محمود متعدد فلموں میں نظر آئے اور اپنی اداکاری سے ، سامعین کے دلوں میں اپنا خاص مقام بنا لیا۔ محمود کی کچھ بڑی فلموں میں دو بیگھہ زمین ،ناستک، سی آئی ڈی ، فنٹوش ، پرورش ، قیدی نمبر 911 ، دل تیرا دیوانہ ، بھوت بنگلہ ، گمنام ، بمبئی ٹو گوا ، پتھر کے صنم ، پڑوسن ، کنوارا باپ وغیرہ شامل ہیں۔</div>
<div>محمود نے بھوت بنگلہ فلم کی پروڈکشن اور ہدایتکاری کی۔ اس کے علاوہ انہوں نے چھوٹے نواب اور پڑوسن بھی بنائی۔ فلم پڑوسن 60 کی دہائی کی ہت فلم تھی۔ پڑوسن کا شمار ہندی سنیما کی بہترین مزاحیہ فلموں میں ہوتا ہے۔</div>
<div>تقریباً پانچ دہائیوں تک ہندی سنیما پر راج کرنے والے محمود نے مشہور اداکارہ مینا کماری کی بہن مدھو سے شادی کی۔ محمود کا بیٹا لکی علی بھی محمود کی طرح فلموں میں اداکار رہ چکے ہیں۔ محمود کا 23 جولائی 2004 کو امریکہ میں علاج کے دوران انتقال ہوگیاتھا۔ وہ آج بھی اپنی شاندار اداکاری وجہ سے شائقین کے</div>
<div> دلوں میں زندہ ہیں۔</div>
<div>یوں تو فلم انڈسٹری میں نہ جانے کتنے باصلاحیت  اور ہنر مند فنکار موجود ہیں لیکن سچ بات تو یہ ہے کہ محمود جیسے فنکار روز روز کہاں پیدا ہوتے ہیں.</div>
</div>.