پاکستان کے داسو ڈیم کی ٹیم پر بم حملہ، غیر ملکیوں سمیت 10 افراد جاں بحق

اسلام آباد،14جولائی(انڈیا نیرٹیو)

پاکستان کے شمالی مغربی صوبہ خیبر پختونخوا کے ہزارہ ڈویڑن کے ضلع اپر کوہستان میں برسین لیبر کیمپ سے داسو جانے والی گاڑی میں کیمپ کے قریب دھماکا ہوا ہے جس کے نتیجے میں 10 افراد جاں بحق اور 39 زخمی ہو گئے۔اپرکوہستان کے ضلعی پولیس افسر (ڈی پی او)نے ذرائع ابلاغ کو بتایا کہ حادثے کی وجوہات سامنے نہیں آئیں تاہم حادثے میں 13 افراد کی موت کی تصدیق ہو گئی ہے جن میں سے 9 چینی شہری اور 2 مقامی مزدور بھی شامل ہیں، جب کہ اسپتال انتظامیہ کا کہنا ہے کہ 7 افراد کی حالت انتہائی تشویش ناک ہے۔

پولیس حکام کا کہنا ہے کہ واقعہ کی اطلاع ملتے ہی ریسکیو اور پولیس کی ٹیمیں جائے حادثہ پر پہنچ گئیں اور لاشوں اور زخمیوں کو اسپتال منتقل کردیا گیا، جب کہ جائے وقوعہ کو دیگر سیکورٹی اہلکاروں کی مدد سے سیل کردیا گیا ہے، تاحال حادثے کی وجوہات سامنے نہیں آسکیں۔ادھر ڈپٹی کمشنر عارف خان یوسفزئی نے ذرائع ابلاغ سے بات کرتے ہوئے کہا کہ کوسٹر گاڑی میں 41 افراد سوار تھے۔

حادثے میں 9 چینی باشندوں سمیت 13 افراد جاں بحق ہوئے، جن میں دو ایف سی جوان اور 2 مقامی مزدور بھی شامل ہیں۔ تحقیقات مکمل ہونے پر وجوہات کا بتایا جا سکے گا۔ المناک واقعہ کی تحقیقات کی جا رہی ہیں۔ تحقیقات سے قبل واقعہ کو حملہ یا دہشت گردی سے منسوب نہیں کہا جا سکتا۔

داسو میں رونما ہونے والے واقعے وزیر اعلی محمود خان کی ہدایت پر صوبائی حکومت کا اعلی سطحی وفد کوہستان پہنچ گیا۔ وفد میں کامران بنگش، چیف سیکرٹری اور آئی جی پی خیبر پختونخوا شامل ہیں، معاون خصوصی برائے اطلاعات کامران بنگش کا کہنا ہے کہ معاملے کی جانچ کے بعد میڈیا کو صورت حال سے آگاہ کیا جائے گا۔