واشنگٹن ،22دسمبر (انڈیا نیرٹیو)

یوکرین کے صدر ولودومیر زیلنسکی نے واضح کردیا کہ امریکہ کے پیسے سرمایہ کاری ہیں، خیرات نہیں۔امریکہ کے دورے پر آئے ہوئے یوکرین صدر نے امریکی کانگریس سے خطاب کرتے ہوئے کہا کہ تمام مشکلات کے باوجود یوکرین گِرا نہیں اور اب بھی دفاع کر رہا ہے۔

ولودومیر زیلنسکی نے کہا کہ ہم نے دنیا کے ذہنوں کی جنگ میں روس کو شکست دی، جنگ جاری ہے اور ہمیں میدانِ جنگ میں روس کو شکست دینی ہے۔یوکرینی صدر نے کہا کہ یوکرین نے کبھی بھی امریکی فوجیوں کو اپنی سرزمین پر لڑنے کے لیے نہیں کہا، ہمارے فوجی خود امریکی ٹینکس اور طیارے مکمل طور پر چلا سکتے ہیں۔انہوں نے کہا کہ یوکرین کو امداد جمہوریت کے لیے سرمایہ کاری ہے چیریٹی نہیں، امید ہے کانگریس اراکین یوکرین کی امداد جاری رکھیں گے۔

ولودومیر زیلنسکی نے مزید کہا کہ امریکی کانگریس میں خطاب کرنا اعزاز ہے۔ دوسری جانب غیرملکی خبر ایجنسی کا کہنا ہے کہ امریکہ نے یوکرین کے لیے 1.85 ارب ڈالر اضافی فوجی امداد کا اعلان کیا ہے۔رپورٹس کے مطابق امریکہ کی جانب سے امداد میں پیٹریاٹ فضائی دفاعی نظام بھی شامل ہے۔