دبئی،07نومبر(انڈیا نیریٹو)۔

متحدہ عرب امارات میں ڈھائی سال پہلے کورونا وبا کے بعد عائد کی گئیں تمام پابندیاں اور احتیاطی تدابیر ختم کرنے کا اعلان کردیا گیا ہے۔اماراتی حکومت کی جانب سے اتوار کو کیے گئے اعلان کے مطابق عبادت گاہوں، مساجد سمیت تمام کھلی اور بند سہولتوں میں ماسک اختیاری ہوں گے۔تاہم اسپتال اور صحت کے مراکز میں ماسک پہننا لازمی ہوگا۔

امارات حکومت کے اعلان کے مطابق امارات میں کورونا پابندیاں خاتمے کے نئے احکامات کا اطلاق پیر7 نومبر کو صبح 6 بجے سے ہوگا۔ عوامی سہولیات اور حکومتی اداروں میں داخلے کے لیے امارات کی کوویڈ الحسن ایپ پر گرین پاس کی ضرورت نہیں رہی۔خیال رہے کہ کوویڈ منفی ٹیسٹ کے بعد الحسن ویب پر گرین پاس ظاہر ہوتا رہا ہے۔