لندن،02ستمبر (انڈیا نیرٹیو)

برطانیہ کے وزیر خارجہ ڈومینک راب طالبان سے مذاکرات کے لیے قطر روانہ ہو گئے، دوحہ میں وہ طالبان قیادت سے افغانستان سے برطانوی شہریوں اور افغان مترجمین کے محفوظ انخلا سے متعلق بات کریں گے۔   میڈیا ذرائع کے مطابق برطانوی وزیر خارجہ اپنے دورہ قطر کے دوران امیر قطر شیخ تمیم بن حمد الثانی سے بھی ملاقات کریں گے، اس کے علاوہ ان کی قطر کے نائب وزیر اعظم اور وزیر خارجہ شیخ محمد بن عبدالرحمان الثانی سے بھی ملاقات ہو گی۔

برطانوی دفتر خارجہ کے مطابق اس دورے کے دوران ڈومینک راب چار نکات پر مذاکرات کریں گے جن میں افغانستان کو دہشت گردوں کی آماجگاہ بنانے سے روکنا، افغانستان میں شہریوں کو جن مصائب کا سامنا ہے ان کا مؤثر جواب دینا، علاقائی امن کو یقینی بنانا اور طالبان کو انسانی حقوق سے متعلق جوابدہ بنانا شامل ہے۔

دوسری جانب برطانوی وزارت خارجہ کا کہناہے برطانوی سفارتخانہ کابل سے دوحامنتقل کر دیا گیا ہے، کابل کیلئے برطانوی سفارتخانہ دوحاسے کام کر رہا ہے۔

برطانیہ، امریکہ کو کابل ایئرپورٹ پر حملے کے خطرے کا علم تھا

کابل ایئرپورٹ پر خودکش دھماکے سے پہلے برطانیہ اور امریکہ کو حملوں کے خطرات کا علم تھا، اس کے باوجود برطانوی سفارت خانے نے افغان شہریوں کو ایئرپورٹ کے ایبے گیٹ پر جمع ہونے کی ہدایت کی۔

 میڈیا ذرائع  کے مطابق یہ انکشاف سامنے آنے والی ای میلز سے ہوا، برطانوی حکومت نے ای میلز کی تحقیقات شروع کردیں۔واضح رہے کہ کابل ایئرپورٹ کے ایبے گیٹ پر ہونے والے دھماکے میں تقریباً 200 افراد جان سے گئے تھے۔