ماسکو/کیف، 15 اپریل (انڈیا نیرٹیو)

روس اور یوکرین کے درمیان جنگ کو پچاس دن گزر چکے ہیں۔ جمعہ کو 51ویں روز بھی یوکرین پر روس کے حملوں میں کمی نہیں آ رہی ہے۔ دریں اثناء   روس کے وزیر دفاع کو دل کا دورہ پڑا ہے جس کے بارے میں خیال کیا جاتا ہے کہ یہ روسی صدر ولادی میر پوتن  کے ساتھ جنگ  کے حوالے سے تنازع کا نتیجہ ہے۔ کئی سربراہان مملکت کے یوکرین کے دورے کے درمیان اب امریکی صدر جو بائیڈن کے بھی یوکرین کے دارالحکومت کیف کا دورہ کرنے کی باتیں منظر عام پر آ گئی ہیں۔

روس-یوکرین جنگ کے پہلے پچاس دنوں میں دونوں ممالک کے درمیان جھڑپوں کے نتیجے میں عام شہریوں کی ہلاکتیں ہوئی ہیں۔ اب تک پچاس لاکھ یوکرائنی شہری ملک چھوڑ چکے ہیں۔ 70 لاکھ سے زیادہ لوگ اپنے گھر بار چھوڑنے پر مجبور ہیں اور بے گھر ہونے کا درد جھیل رہے ہیں۔ جنگ کے حوالے سے روس کے اندرونی تنازعات کی اطلاعات بھی منظر عام پر آرہی ہیں۔ روس کے وزیر دفاع سرگئی شوئیگو جو کہ گزشتہ چند دنوں سے نظر نہیں آرہے تھے کو دل کا دورہ پڑا ہے۔ خیال کیا جاتا ہے کہ روسی صدر پوتن اور سرگئی کے درمیان یوکرین کے معاملے پر اختلافات تھے۔ یہ اختلافات تنازعہ کی سطح تک پہنچ گئے، جس کے نتیجے میں سرگئی کو دل کا دورہ پڑا۔

دوسری جانب روسی جارحیت کے درمیان یوکرین کے حوصلے بلند کرنے کے لیے کئی سربراہان مملکت نے یوکرین کے دارالحکومت کیف کا دورہ کیا ہے۔ اب ایسے اشارے مل رہے ہیں کہ جلد ہی امریکی صدر جو بائیڈن بھی کیف کا دورہ کریں گے۔ اس کی تیاری شروع کر دی گئی ہے۔