پورٹ لوئس،21 فروری

 ماریشس میں آسمانی آفت سے زندگی درہم برہم ہوگئی ہے۔ پیر کو طوفان فریڈی کے ٹکرانے سے شدید بارش ہوئی ہے۔ محکمہ موسمیات کے مطابق طوفان کی وجہ سے ہوا کی رفتار 280 کلومیٹر یا 170 میل فی گھنٹہ تک پہنچ سکتی ہے۔آنے والے خطرے کے پیش نظر کئی پروازیں منسوخ کر دی گئی ہیں اور اسٹاک ایکسچینج کو بند کر دیا گیا ہے۔

لوگوں کو خبردار کیا گیا ہے کہ وہ بلا ضرورت گھروں سے باہر نہ نکلیں۔ اس کے ساتھ ہی سمندر میں سات میٹر اونچی لہریں اٹھنےکا بھی امکان ہے۔ ماریشس کے وزیر اعظم پروِند جگناتھ نے شہریوں سے تمام ضروری احتیاطی تدابیر اختیار کرنے کی اپیل کی ہے۔ انہوں نے کہا کہ یہ ایک طاقتور طوفان ہے۔ اس سے ماریشس، روڈرگس اور سینٹ برینڈن جزائر کو براہ راست خطرہ لاحق ہے۔سائیکلون فریڈی کے منگل کی رات کمزور ہونے کی توقع ہے۔