جنوبی افریقہ میں سیلاب نے زبردست تباہی مچائی ہوئی ہے۔ ملک کی اس مہلک ترین آفت میں اب تک 400 سے زیادہ افراد ہلاک ہو چکے ہیں، جب کہ کئی ہزار افراد بے گھر ہو گئے ہیں۔ جنوب مشرقی ساحلی شہر ڈربن کے کچھ علاقے زیر آب آ گئے، جس کے بعد سڑکیں پوری طرح سے اکھڑ گئیں۔ سیلاب میں اسپتال اور گھر تباہ ہو گئے اور لوگ پانی میں بہہ گئے۔حکومت کی جانب سے ہفتہ کے روز اطلاع دیتے ہوئے بتایا گیا کہ اس آفت میں مرنے والوں کی تعداد 398 سے تجاوز کر گئی ہے، وہیں 27 افراد گمشدہ ہیں۔ حکومت نے بتایا کہ 40 ہزار لوگ بے گھر ہو گئے ہیں۔ حکومت کے مطابق گھروں میں پھنسے ہوئے لوگوں اور لاشوں کو نکالنے کا کام جاری ہے۔ پولیس سے لے کر فوج اور رضاکار تک تلاشی اور بچاؤکے کام میں مصروف ہیں۔ بچاو? ٹیم کے مطابق ڈربن ضلع کے لاپتہ ایک کنبہ کے 10 افراد کو تلاش نہیں کیا جا سکا ہے۔

ڈربن ایمرجنسی میڈیکل سروس کے ترجمان کا کہنا ہے کہ سیلاب آنے کے 6 دن بعد اب کسی کے زندہ بچ جانے کی امید بہت کم ہے۔ انہوں نے بتایا کہ لوگ اپنے لاپتہ رشتہ داروں کو ڈھونڈنے کے لیے مارے مارے پھر رہے ہیں۔ خیال رہے کہ صورتحال کے پیش نظر حکومت نے ایمرجنسی ریلیف فنڈ میں ایک ارب رینڈ (68 ملین ڈالر) فراہم کرنے کا اعلان کیا ہے۔ اس کے علاوہ افریقی فٹ بال کنفیڈریشن کے سربراہ پیٹریس موٹسیپ نے 30 ملین رینڈ فراہم کرنے کا اعلان کیا ہے۔