سابق وزیر اعظم عمران خان کو آج پاکستانی رینجرس نے اسلام آباد ہائی کورٹ سے گرفتار کرلیاگیا ہے۔ معلومات کے مطابق عمران خان آج اسلام آباد ہائی کورٹ میں ایک کیس کی پیشی میں حاضر ہوئے تھے۔ وہیں سے پاکستانی رینجرس نے انہیں زبردستی گرفتار کرلیا۔پاکستانی میڈیا کے مطابق القادر نیب ٹرسٹ کیس میں گرفتار کیا گیا ہے۔
اسلام آباد ہائی کورٹ جانے سے قبل عمران خان نے قوم سے بات کرتے ہوئے ایک ویڈیو جاری کیا تھا۔ اس میں کہاگیا ہے کہ ’’ مجھے پاکستان کی سیاست میں بیٹھے لوگ قتل کرانے کی سازش کر رہے ہیں۔ ممکن ہے کہ میرا قتل ہوجائے۔ پاکستان ملیٹری اور ایجنسی پر بات کرتے ہوئے عمران خان نے کہا کہ پاکستانی حکومت ایجنسی کا غلط استعمال کر رہی ہے۔ حالاں کہ یہ ایجنسی کسی سیاسی پارٹی کی نہیں بلکہ ملک کی ایجنسی ہے‘‘۔
واضح ہو کہ پاکستان تحریک انصاف کے کارکنان یہ دعویٰ کر رہے ہیں کہ ’’ عمران خان کو اغوا کیا گیا ہے‘‘۔ پاکستان کی تاریخ بھی عجیب و غریب ہے۔ پاکستان کا کوئی بھی وزیر اعظم آج تک عہدہ سے برطرف ہونے کے بعد سکون اور عزت کے ساتھ پاکستان میں زندگی نہیں گزار سکے۔ عمران خان کا بھی کچھ یہی حال ہوا ہے۔
اس پس منظر میں یہ بات بھی بہت اہم ہے کہ عمران خان کو پاکستان تحریک انصاف کا زبردست سپورٹ حاصل ہے۔ اس بیچ انہیں گرفتار کیا جانا کیا برسر اقتدار پارٹی کے لیے مناسب قدم ہے؟ دیکھتے ہیں کہ پاکستان میں آگے کیا ہوتا ہے لیکن یہ طے ہے کہ لاکھوں کی تعداد میں کارکنان سڑکوں پر نکلیں گےاور پاکستانی فوج کے لیے مسائل بھی پیدا کریں گے۔
