بھارتی خفیہ ایجنسیوں کے مطابق پاکستان کی آئی ایس آئی پنجاب سمیت ملک میں بدامنی پھیلانے کے لیے کینیڈا کو اڈے کے طور پر استعمال کر رہی ہے۔ پنجاب کی ٹارگٹ کلنگ خالصتانیوں اور کینیڈا میں بیٹھے غنڈوں کی مدد سے کی جا رہی ہے۔

بھارت مسلسل کینیڈا کی حکومت سے خالصتانی تنظیموں کے ساتھ ساتھ ملک دشمن عناصر کے خلاف کارروائی کا مطالبہ کر رہا ہے لیکن کینیڈین حکومت اس معاملے میں ہاتھ پر ہاتھ دھرے بیٹھی ہے۔

اس بیچ خالصتان پر پاکستان کی سازش کے بارے میں بڑا انکشاف ہوا ہے۔ خفیہ اداروں سے ملنے والی معلومات کے مطابق پاکستان دنیا کے مختلف ممالک میں مقیم خالصتانی حامیوں کے ذریعے پنجاب کو بھارت سے الگ کرنے کی سازش میں مصروف ہے۔

پاکستان کی خفیہ ایجنسی آئی ایس آئی نے پاکستان کے شہر لاہور میں خالصتانی دہشت گردوں کے ساتھ کئی ملاقاتیں کی ہیں۔ پاکستان دنیا بھر میں موجود اپنے سفارت خانوں اور ہائی کمیشنوں کے ذریعے خالصتانی حامیوں اور دہشت گردوں کی مدد کرنے کے ساتھ ساتھ انہیں فنڈنگ اور ہتھیار بھی فراہم کر رہا ہے، تاکہ ہندوستان میں بدامنی پھیلائی جا سکے۔

زی میڈیا کے پاس موجود خصوصی دستاویزات سے انکشاف ہوا ہے کہ خالصتانی تنظیموں کی جانب سے سینکڑوں جعلی ٹوئٹر ہینڈل بنائے گئے ہیں، جن کے ذریعے خالصتان ریفرنڈم کی سازش رچی جارہی ہے۔

سوشل میڈیا پر خالصتان کی حمایت کرنے والے 1450 گھوسٹ ٹویٹر اکاؤنٹس کے بارے میں معلومات ملی ہیں جن کے فالوورز صفر ہیں۔ سوشل میڈیا پر خالصتان سے متعلق ہیش ٹیگز کو ٹرینڈ کرنے کے لیے خالصتانی گروپ ایسے گھوسٹ ٹویٹر اکاؤنٹس کی مدد لیتے ہیں۔

یہی نہیں، گزشتہ ماہ 10 ستمبر سے 10 اکتوبر کے درمیان خالصتان ریفرنڈم کی حمایت میں 29032 ٹویٹس کیے گئے، جنہیں دنیا بھر میں 7826 افراد نے ری ٹویٹ کیا۔