لندن،11؍ نومبر

وزیر اعظم شہباز شریف نے الزام عائد کیا ہے کہ سابق وزیر اعظم عمران خان اپنی تحریک کے ذریعے پاکستان کو تباہ کرنے کی کوشش کر رہے ہیں۔سابق وزیراعظم نواز شریف سے مذاکرات کے تیسرے دور کے بعد میڈیا سے مختصر گفتگو کرتے ہوئے وزیراعظم نے کہا کہ عمران خان پاکستان کو برباد کرنا چاہتے ہیں لیکن ایسا نہیں ہوگا۔

وزیر اعظم نے کہا: “جو لوگ لانگ مارچ کر رہے ہیں، شکست ان کا مقدر ہے۔”پی ایم ایل این کے سربراہ نواز شریف نے کہا: “آئیے پاکستان کی بہتری کے لیے دعا کریں۔ آئیے اللہ سے دعا کریں کہ وہ پاکستان کو راہ راست پر ڈالنے کے لیے رہنمائی فرمائے۔ پاکستان بہت مشکل میں ہے۔

نواز شریف نے کہا کہ ہم نے پہلے کبھی ہجوم کی ڈکٹیشن نہیں سنی اور نہ اب کریں گے۔نواز شریف نے پہلے دن جیو نیوز کو بھی تصدیق کی تھی کہ انہیں حکومت پاکستان سے سفارتی پاسپورٹ مل گیا ہے۔

پاسپورٹ کے بارے میں پوچھے جانے پر سابق وزیر اعظم نے کہا کہ میرے پاس یہ پاسپورٹ کچھ دنوں سے ہے۔ شریف خاندان کے ایک فرد نے بھی تصدیق کی کہ نواز شریف کا پاسپورٹ لندن پہنچ گیا ہے۔ اس بیچ مریم نواز شریف نے پی ٹی آئی کے لانگ مارچ کی مذمت کی ہے ۔ انہوں نے کہا کہ لانگ مارچ کی وجہ سے عام لوگ بڑی مشکل میں ہیں۔

“لوگ پھنسے ہوئے ہیں اور مشکلات کا سامنا کر رہے ہیں۔  نواز شریف اور وزیر اعظم  شہباز شریف دونوں نے اگلے آرمی چیف کی تقرری سے متعلق سوالات کا جواب نہیں دیا۔ مذاکرات کے دو دور میں وزیر دفاع خواجہ آصف اور پنجاب پی ایم ایل این کے رہنما ملک محمد احمد خان نے بھی شرکت کی۔