اسلام آباد، 27 مارچ ( انڈیا نیرٹیو)

 پاکستان میں مہنگائی عروج پر پہنچ گئی ہے۔ حکومت پاکستان کے اعدادوشمار کے مطابق مارچ کے آخری ہفتے تک مہنگائی کی شرح 47 فیصد تک پہنچ گئی۔ اشیائے ضروریہ کی قیمتوں میں 228 فیصد تک اضافہ درج کیا گیا ہے۔

اس وقت رمضان المبارک کا مہینہ چل رہا ہے لیکن پاکستانی عوام مہنگائی کا عذاب برداشت کرنے  پر مجبور ہیں۔ حکومت پاکستان کے محکمہ شماریات کی جانب سے جاری کردہ سنسیٹیو پرائس انڈیکیٹر کے اعداد و شمار خوفناک ہیں۔ اس کے مطابق مارچ کے آخری ہفتے میں پاکستان میں مہنگائی کی شرح 47 فیصد تک پہنچ گئی جس کی وجہ سے پاکستان میں روزمرہ کی چیزوں کی قیمتوں میں مسلسل اضافہ ہو رہا ہے اور پہلے ہی مشکلات کا شکار پاکستانی عوام اس میں پس رہے ہیں۔

 سنسیٹیو پرائس انڈیکیٹر نے عام آدمی کے لیے 51 اشیائے ضروریہ کی قیمتوں میں اضافے کے اعداد و شمار جاری کیے ہیں۔ ان میں سب سے زیادہ 228 فیصد اضافہ پیاز کی قیمتوں میں ہوا ہے۔ اس کے علاوہ آٹے کی قیمت بھی 120 فیصد تک آسمان کو چھونے لگی ہے۔ چائے 94 فیصد، کیلے 89 فیصد، چاول 81 فیصد اور انڈے 79 فیصد مہنگے ہوئے ہیں۔

دوسری جانب ڈیزل کی قیمتوں میں 102 فیصد اور پیٹرول کی قیمتوں میں 81 فیصد اضافہ ہوا ہے۔ 51 اشیا میں سے محض13 اشیا  ایسی ہیں جن کی قیمتوں میں اضافہ نہیں ہوا۔ دیگر تمام اشیا کی قیمتوں میں اضافے سے عوام میں کھلبلی مچ گئی ہے۔