دمشق،04فروری(انڈیا نیرٹیو)

شام کے شمال مغربی صوبہ ادلب میں امریکی فوج نے جمعرات کو علی الصباح ایک چھاپا مارکارروائی میں داعش کے رہنما عبداللہ قرداش الملقب ابوابراہیم الہاشمی القرشی کو ہلاک کردیا ہے۔امریکی صدربائیڈن نے ایک بیان میں خود داعش کے لیڈر کی ہلاکت کی اطلاع دی ہے اور بتایا ہے کہ امریکی اسپیشل آپریشنزفورسز نے ادلب میں انسداد دہشت گردی مشن کے تحت کارروائی کی ہے۔اس میں بچّوں سمیت تیرہ افراد ہلاک ہوئے ہیں لیکن امریکی فوج کے کسی جانی نقصان کی اطلاع نہیں ملی۔اس کارروائی کے دوران میں ایک امریکی ہیلی کاپٹرزمین پر گرکر تباہ ہو گیا۔

صدربائیڈن نے بیان میں کہا:”گذشتہ شب میری ہدایت پر شمال مغربی شام میں ہماری افواج نے امریکی عوام اور ہمارے اتحادیوں کے تحفظ اور دنیا کو ایک محفوظ جگہ بنانے کے لیے انسداد دہشت گردی آپریشن کامیابی سے انجام دیا ہے۔اپنی مسلح افواج کی مہارت اور بہادری کی بدولت ہم نے داعش کے رہنما ابوابراہیم الہاشمی القرشی کا خاتمہ کردیا ہے اورتمام امریکی فوجی اس کارروائی کے بعد بہ حفاظت واپس آ گئے ہیں“۔اس واقعے سے آگاہ ایک امریکی عہدہ دار نے بتایا کہ ”شہری ہلاکتیں کارروائی کا ہدف کمپاؤنڈ(مکان) میں ایک شخص کی وجہ سے ہوئی ہیں۔اس نے دھماکا خیزمواد کو اڑادیاتھا جس کے نتیجے میں متعدد خواتین اور بچّے ہلاک ہوئے ہیں“۔اس عہدہ دار نے نام ظاہر نہ کرنے کی شرط پر بتایا کہ ایک امریکی ہیلی کاپٹر میں میکانیکی خرابی کا سامنا کرنا پڑا تھا جس کی وجہ سے امریکی فوجیوں نے دوسرے طیاروں پر اڑنے سے پہلے اسے اپنی جگہ پر دھماکے سے اڑا دیا۔

علاقے کے مکینوں نے علی الصباح ایک زوردارگھن گرج کا ذکر کیا جس میں متعدد ہیلی کاپٹراور بھاری مشین گنوں کے فائر شامل تھے۔شام کے شہری دفاع کے رضاکار گروپ سفید ہیلمٹس نے اطلاع دی ہے کہ انھوں نے اب تک ایک گھرسے 13 لاشیں برآمد کی ہیں۔ان میں چھیبچّوں اور چار خواتین کی لاشیں بھی شامل ہیں جو بظاہر اس کارروائی کا نشانہ بنے ہیں۔انھوں نے نزدیک واقع گھر میں رہنے والی ایک نوجوان لڑکی کا علاج کیا ہے۔سفید ہیلمٹس کے بہ قول امریکی فوجیوں کی کارروائی میں اس لڑکی کاپورا خاندان مارا گیا ہے۔

ادلب کے مکینوں نے بتایا کہ انھوں نے مقامی وقت کے مطابق رات ایک بجے ہیلی کاپٹروں کی آواز سنی تھی اور یہ سلسلہ تین بجے کے بعد تک جاری رہا تھا۔برطانیہ میں قائم شامی رصدگاہ برائے انسانی حقوق کا کہنا ہے کہ امریکی فوجیوں کے حملے کا نشانہ بننے والے گھر میں تصادم کے دوران میں فائرنگ کا تبادلہ ہوا ہے۔علاقے کے مکینوں نے بتایا ہے کہ امریکی فوجیوں کی چھاپامار کارروائی میں ترکی کی سرحد سے قریباً ایک میل کے فاصلے پرواقع ایک دو منزلہ مکان کو نشانہ بنایا گیا۔یہ زیتون کے باغات سے گھرا ہوا دکھائی دے رہا تھا۔

سوشل میڈیا پر گردش کرنے والی ویڈیوزمیں گولیوں کی آوازیں سنی جا سکتی ہے۔ہیلی کاپٹر سے فائرنگ کی چمک نظرآتی ہے۔ایک مقامی صحافی کی کھینچی گئی تصاویر میں دیکھا جا سکتا ہے کہ مکان کی بالائی منزل کا ایک حصہ جزوی طورپرگرگیا ہے اور دیواروں کو نقصان پہنچا ہے۔مکان کے ایک حصے میں خون اور بکھرا ہواملبہ نظر آ رہا تھا۔