پیانگ یانگ، 27 مارچ (انڈیا نیرٹیو)

 جنوبی کوریا اور امریکہ کے درمیان جاری مشترکہ فوجی مشقوں کوشمالی کوریامسلسل  چیلنج کررہا ہے۔ شمالی کوریا نے ایک بار پھر مشرقی سمندر کی طرف بیلسٹک میزائل داغا ہے۔ جنوبی کوریا کے ساتھ ساتھ جاپان نے بھی میزائل داغے جانے کی تصدیق کے بعد ہنگامی الرٹ جاری کی ہے۔

اس وقت جنوبی کوریا اور امریکہ کے درمیان مشترکہ فوجی مشقیں جاری ہیں۔ گزشتہ ہفتے شروع ہونے والی فوجی مشقیں 3 اپریل کو ختم ہونے والی ہیں۔ شمالی کوریا اس فوجی مشق کی کھل کر مخالفت کر رہا ہے۔ یہ فوجی مشق شروع ہوتے ہی شمالی کوریا نے کئی میزائل داغے ہیں۔ ان میں زیر آب ایٹمی حملہ کرنے کے قابل ڈرون کا تجربہ بھی شامل ہے۔

اب ایک بار پھر شمالی کوریا نے میزائل داغ کر جنوبی کوریا کے ساتھ ساتھ امریکہ کو بھی للکارا ہے۔ جنوبی کوریا کی فوج کے مطابق شمالی کوریا نے مشرقی سمندر کی جانب ایک بیلسٹک میزائل داغا ہے۔ جنوبی کوریا کے جوائنٹ چیفس آف اسٹاف نے کہا کہ فوج میزائل کی پرواز کے فاصلے اور دیگر تفصیلات کا تجزیہ کر رہی ہے۔

دریں اثنا جاپان کے وزیر اعظم کے دفتر نے بھی میزائل لانچ ہونے کی تصدیق کرتے ہوئے ہنگامی الرٹ جاری کر دیا ہے۔ جاپان کے وزیر اعظم کے دفتر نے ایک ٹویٹ میں کہا کہ شمالی کوریا نے ایک مشتبہ بیلسٹک میزائل کا تجربہ کیا ہے۔ مزید تفصیلات آنا باقی ہیں۔

وزیراعظم آفس نے طیاروں سمیت مختلف دفاعی نظاموں کی حفاظت کو یقینی بناتے ہوئے زیادہ سے زیادہ معلومات اکٹھی کرنے کی ہدایات دی ہیں۔اس کے ساتھ ساتھ عوام سے بھی کہا گیا ہے کہ وہ مقررہ وقت میں معلومات فراہم کریں۔