واشنگٹن،28 فروری

 تمام تر دعووں کے باوجود پاکستان دہشت گردی سے نمٹنے میں کامیاب نہیں ہو رہا۔ امریکہ کے بیورو آف کاونٹر ٹیررزم کی رپورٹ میں دعویٰ کیا گیا ہے کہ پاکستان کی ناکامی سے دہشت گردی کے واقعات میں اضافہ ہوا ہے۔

پاکستان پر مسلسل دہشت گردی کی مالی معاونت اور دہشت گردوں کو تحفظ فراہم کرنے کا الزام لگایا جاتا رہا ہے۔ اسی وجہ سے تمام پابندیوں کے بعد حکومت پاکستان نے کئی عالمی فورمز پر دہشت گردی پر موثر کنٹرول کی بات کہی تھی۔

اب امریکہ کے بیورو آف کاونٹر ٹیررزم کی نئی رپورٹ سے یہ بات واضح طور پر سامنے آئی ہے کہ پاکستان نے دہشت گردی سے نمٹنے کے نام پر دنیا کی آنکھوں میں دھول جھونکنے کا کام کیا ہے۔

 رپورٹ کے مطابق دہشت گردوں کے خاتمے کے لیے پاکستانی کوششوں کی رفتار بہت سست ہے۔ اسی وجہ سے سال 2020 کے مقابلے 2021 میں نہ صرف دہشت گردی کے واقعات میں اضافہ ہوا ہے بلکہ 2021 میں دہشت گرد حملوں میں ہلاک اور زخمی ہونے والوں کی تعداد میں بھی اضافہ ہوا ہے۔

دہشت گردی پر مرکوز اس امریکی رپورٹ میں پاکستان کی سرزمین پر پنپنے والی دہشت گرد تنظیموں کے نام براہ راست لکھے گئے ہیں۔ تحریک طالبان پاکستان (ٹی ٹی پی)، بلوچستان لبریشن آرمی (بی ایل اے) اور آئی ایس آئی ایس کے جیسی دہشت گرد تنظیموں کے سرگرم ہونے کی بات کہی گئی ہے۔

رپورٹ میں کہا گیا ہے کہ پاکستان میں علیحدگی پسند دہشت گرد تنظیموں نے زیادہ تر بلوچستان اور صوبہ سندھ کو نشانہ بنایا۔ یہاں دہشت گردوں نے آئی ای ڈی، وی بی آئی ای ڈی، خودکش بم دھماکوں اور ٹارگٹ کلنگ جیسے حربے اپنائے۔