اسلام آباد، 27 مارچ (انڈیا نیرٹیو)

حکومت بچانے کے لیے اپوزیشن سے برسرپیکار پاکستان کے وزیر اعظم عمران خان نے اسلام آباد میں اپنے حامیوں کی ایک بڑی ریلی میں کہا کہ وہ کسی بھی صورت میں نہیں جھکیں گے۔ پاکستان کے وزیر اعظم عمران خان نے اتوار کو اپوزیشن کی طرف سے لائی گئی تحریک عدم اعتماد پر ووٹنگ سے قبل اسلام آباد میں اپنی سیاسی گرفت کا مظاہرہ کیا۔

جلسے سے خطاب کرتے ہوئے عمران نے کہا کہ میں نے سیاست میں پاکستان کی ترقی کے لیے قدم رکھا۔ عمران خان نے اپنی حکومت کی حصولیابیاں شمار کراتے ہوئے کہا کہ جب ہماری حکومت آئی تو ہم نے عوام کو ہیلتھ انشورنس فراہم کی۔ عمران خان نے کہا کہ ہماری حکومت نے ایندھن کی قیمتوں کو کنٹرول میں رکھنے کی کوشش کی۔ ہم نے نچلے طبقے کو اوپر اٹھانے کی کوشش کی۔

پیسے کے زور پر ہماری حکومت گرانے کی کوشش کی جا رہی ہے۔ انہوں نے کہا کہ اگر ہماری حکومت جاتی ہے تو جائے، ہم ان کے سامنے جھکنے والے نہیں ہیں۔ ہم ایک ایسا ملک بنانا چاہتے ہیں جہاں قانون کی حکمرانی ہو۔ ہم وہ پاکستان بنانا چاہتے ہیں جہاں ہر غریب کو انصاف ملے۔ ہم ایسی خارجہ پالیسی بنانا چاہتے ہیں جو دوسرے ممالک کی جنگ میں نہ پڑے۔

عمران نے کہا کہ ہم ایسا پاکستان بنانا چاہتے ہیں جہاں خواتین کو مساوی حقوق حاصل ہوں۔ ہم نے اس کے لیے قانون بنایا ہے۔ ہم نے ایک قانون بنایا ہے کہ ریاستیں خواتین کو ان کا حق دیں گی۔ مجھے یاد ہے جب عراق پر حملہ ہوا تو برطانیہ کی عوام اس جنگ کے خلاف اٹھ کھڑی ہوئی تھی۔ اسے کہتے ہیں زندہ قوم… آج یہی زندہ قوم ہمارے جلوس میں شامل ہوئی ہے۔ پاکستان کی تاریخ میں کبھی ایسی حکومت نہیں آئی جس نے ملک کو اتنی ترقی دی ہو جتنی ہماری حکومت نے کی۔ اس کے ساتھ ہی عمران نے عوام سے امن برقرار رکھنے کی اپیل کی۔

عمران نے کہا کہ جب کورونا کی وبا آئی تو ہماری حکومت نے اس سے بہتر طریقے سے نمٹنے کا کام کیا۔ ہم نے پورے ملک میں لاک ڈاؤن لگانے سے گریز کیا کیونکہ اس سے غریبوں کی یومیہ اجرت متاثر ہوتی ہے۔ ہم نے وبائی مرض کے دوران پاکستان کو بہتر طریقے سے چلایا۔