مکہ المکرمہ،29جولائی (انڈیا نیرٹیو)

مسجد حرام میں توسیعی منصوبے کے’فیز 3‘ کا آغاز ہوگیا۔ذرائع کے مطابق حرمین شریفین کی انتظامیہ کی جانب سے جاری بیان میں کہا گیا ہے کہ مسجد حرام کی توسیعی منصوبے کے’فیز 3‘ یعنی تیسرے مرحلے کا آغاز ہوگیا ہے۔ منصوبہ مکمل ہونے کے بعد مسجد حرام میں نمازیوں، حجاج اور معتمرین کے لیے مزید گنجائش پیدا ہوجائے گی۔ توسیع کے بعد مسجد حرام کا اجمالی رقبہ 519149 مربع میٹر ہوجائے گا۔

’فیز3‘ منصوبے کے لیے الیکٹراک میکینک سسٹم اورتعمیراتی سرگرمیوں کے لیے 60 مختلف کمپنیوں کو پرمٹ جاری کیے گئے ہیں۔

جاری بیان کے مطابق توسیعی منصوبے میں مطاف کی عمارت کی توسیع بھی شامل ہے۔ توسیع کے دوران دروازوں، مرکزی میناروں سمیت داخلی راستوں باب شاہ عبدالعزیز، باب العمرہ اور باب الفتح کی توسیع بھی شامل ہے۔

انتظامیہ کے مطابق اس سے قبل مطاف عمارت کو بھی مکمل کرلیا گیا ہے جب کہ وزارت خزانہ کے تعاون سے حرم مکی کے توسیع پراجیکٹ میں بنیادی ڈھانچے اوردیگربنیادی سروسز کو بھی مکمل کرلیا گیا ہے۔

سعودی عرب میں چوتھے صنعتی انقلاب فورم کی سرگرمیوں کا آغاز

سعودی عرب میں صنعتی انقلاب کے چوتھے فورم کا  گزشتہ روز آغاز ہوگیا ہے۔ اس فورم کا مقصد نقل و حمل کے مستقبل پر ابھرتی ہوئی ٹیکنالوجی کے اثرات، صحت کے ایسے نظام کی تشکیل پر تبادلہ خیال کیا جائے گا جو بْحرانوں کا مقابلہ کرنے کی صلاحیت رکھتا ہو۔ اس کے علاوہ صنعتی انقلاب فورم میں شفاف توانائی، مستقبل میں سمارٹ شہروں کی تعمیر، ماحولیاتی نظام کی بحالی اور ملک میں مستقبل میں سرمایہ کاری پر بات چیت کی جائے گی۔

سعودی ذرائع ابلاغ کے مطاق سعودی عرب کے دارالحکومت ریاض میں شاہ عبد العزیز سٹی برائے سائنس و ٹیکنالوجی میں اس فورم کا انعقاد کیا گیا ہے۔ فورم میں متعدد حکومتی عہدیدار، ماہرین، صنعتی انقلاب میں دلچسپی رکھنے والی کمپنیوں کے عہدیدار، چوتھے صنعتی انقلاب کو درپیش متعدد چیلنجوں پر تبادلہ خیال کر رہے ہیں۔اسی تناظر میں مواصلات اور انفارمیشن ٹیکنالوجی کے نائب وزیر انجینیر ہیثم العوہلی نے فورم میں منعقدہ مباحثے کے اجلاسوں کے دوران کہا کہ دونوں عالمی کمپنیاں گوگل اور ’علی بابا‘ پہلے ہی سعودی مارکیٹ میں سرمایہ کاری کا اعلان کرچکی ہیں۔ انہوں نے مزید کہا کہ ایسے ممالک میں بھی متعدد پروگرام شروع کیے گئے ہیں۔ جو سرمایہ کاری کی حوصلہ افزائی کرتے ہیں۔