آصف علی  زرداری کی فضل اور مینگل سے گفتگو

پاکستان پیپلز پارٹی (پی پی پی) کے شریک چیئرمین آصف علی زرداری نے حکمران اتحاد سے تعلق رکھنے والے مولانا فضل الرحمان اور سردار اختر مینگل سے ملاقات کی جس میں صدر عارف علوی کو مواخذے کے ذریعے ہٹانے پر تبادلہ خیال کیا گیا۔سابق صدر نے یہاں اسلام آباد میں جمعیت علمائے اسلام فضل (جے یو آئی-ف) اور بلوچ نیشنل پارٹی-مینگل (بی این پی-ایم) کے سربراہوں سے صدر علوی کے مواخذے پر بات چیت کی۔

ملاقات میں جے یو آئی (ف)کے سربراہ نے آصف علی زرداری کو بتایا کہ ان کی پارٹی اگلے صدر کے لیے اپنا امیدوار لا رہی ہے۔آصف علی زرداری بی این پی ایم کے سربراہ کو کابینہ میں شامل کرنے کے خواہاں ہیں۔ سردار اختر مینگل نے شرط کے طور پر چاغی واقعے کے لیے انکوائری کمیشن بنانے کا کہا۔

ملاقات میں سردار اختر مینگل نے آصف علی زرداری کو مشورہ دیا کہ وہ فیصلہ کرنے سے پہلے نمبر چیک کریں۔ انہوں نے یہ بھی کہا کہ کابینہ مختلف مراحل میں بنائی جائے۔ مینگل نے یہ بھی کہا کہ فیصلے کرتے وقت اتحاد کو متحد رہنا چاہیے۔

قبل ازیں ذرائع نے اطلاع دی تھی کہ صدر مملکت ڈاکٹر عارف علوی نے اپنے عہدے سے مستعفی ہونے کا فیصلہ کیا ہے۔یہ فیصلہ پی ٹی آئی کی قیادت سے مشاورت کے بعد کیا گیا۔ ذرائع نے بتایا کہ انہیں اپنی آئینی ذمہ داریاں نبھاتے رہنے کا مشورہ دیا گیا۔