میکرون دو ماہ قبل جیتنے کے بعد دوبارہ فرانس کے صدر بن گئے تھے

فرانس کے پارلیمانی انتخابات میں صدر ایمانوئل میکرون کو بڑاجھٹکا لگا ہے۔ صرف دو ماہ قبل صدارتی انتخاب جیتنے والے میکرون فرانس کی قومی اسمبلی میں اکثریت کھو دی ہے۔

ایمانوئل میکرون دو ماہ قبل ہونے والے صدارتی انتخابات میں کامیابی کے بعد دوبارہ فرانس کے صدر منتخب ہوئے تھے۔ ان کی دوسری میعاد 14 مئی سے شروع ہوئی ہے۔ اس کے بعد فرانس کے پارلیمانی انتخابات میں میکرون کا اتحاد واضح اکثریت حاصل کرنا چاہتا تھا، تاکہ وہ اپنے انتخابی وعدوں کو پورا کر سکے۔ قومی اسمبلی کی 577 نشستوں کے لیے ہونے والے اس انتخاب میں میکرون کو متوقع کامیابی نہیں ملی ہے۔ قومی اسمبلی میں اکثریت کے لیے 289 نشستیں درکار ہیں لیکن میکرون کے اتحاد کو صرف 245 نشستوں سے مطمئن ہونا پڑا۔ ان حالات میں وہ قومی اسمبلی میں اکثریت کھو چکے ہیں۔

ان انتخابات میں دائیں بازو کی رہنما میرین لی پین کی نیشنل ریلی پارٹی اور بائیں بازو کی جماعتوں نے بڑی کامیابی حاصل کی ہے۔ لی پین کی پارٹی نے آٹھ نشستوں کی برتری کے ساتھ اپنی تعداد  89 تک بڑھا دی ہے۔ دوسری طرف بائیں بازو کی جماعتوں کے اتحاد کو 131 نشستیں ملی ہیں۔ پارلیمانی انتخابات کے یہ نتائج فرانس کی سیاست میں ہلچل مچا دینے والے ہیں۔ وزیر اعظم الزبتھ بورن نے ان حالات کو ملک کے لیے خطرناک قرار دیا ہے۔ اس بار پارلیمانی انتخابات میں صرف 46.23 فیصد ووٹروں نے ووٹ ڈالے۔