ابوشحمہ انصاری، نئی دہلی

بی جے پی لیڈروں کے متنازعہ بیان کی دنیا بھر میں مذمت کی جا رہی ہے۔ قطر نے ہندوستانی سفیر دیپک متل کو طلب کیا ہے۔ قطر کی جانب سے یہ قدم ایک ایسے وقت میں اٹھایا گیا ہے جب ہندوستان کے نائب صدر ایم وینکیا نائیڈو قطر کے دورے پر ہیں۔ اس پیشرفت پر، دوحہ میں ہندوستانی سفارت خانے کی طرف سے ایک بیان جاری کیا گیا ہے، جس میں کہا گیا ہے کہ قطر کی جانب سے قابل اعتراض ٹویٹس پر تشویش کا اظہار کیا گیا ہے۔ جس کے جواب میں بھارت کی جانب سے واضح کیا گیا ہے کہ یہ ٹویٹس حکومت ہند کے خیالات کی عکاسی نہیں کرتیں۔ حکومت ہند تنوع میں اتحاد کی مضبوط ثقافتی روایات کے مطابق تمام مذاہب کا سب سے زیادہ احترام کرتی ہے۔ توہین آمیز ریمارکس کرنے والوں کے خلاف پہلے ہی سخت کارروائی کی جا چکی ہے۔ ہندوستان کی طرف سے کہا گیا ہے کہ ہمیں ایسے شرپسند عناصر کے خلاف مل کر کام کرنا چاہیے۔ جس کا مقصد ہمارے دوطرفہ تعلقات کی مضبوطی کو کمزور کرنا ہے۔

غور طلب ہے کہ بی جے پی کی ترجمان نوپور شرما نے حال ہی میں ایک انگریزی ٹی وی چینل پر ڈیبیٹ شو کے دوران پیغمبر اسلام کے بارے میں متنازعہ بیان دیا تھا۔ اتوار کو بی جے پی نے ان کے بیان سے خود کو الگ کیا اور انہیں پارٹی سے معطل کر دیا۔

بتادیں کہ ہندوستان کے نائب صدر ایم وینکیا نائیڈو ہفتہ کو قطر پہنچ گئے ہیں۔ اتوار کو انہوں نے یہاں قطر کے وزیر اعظم اور وزیر داخلہ شیخ خالد بن خلیفہ بن عبدالعزیز آل ثانی سے ملاقات کی اور دونوں رہنماؤں نے وفود کی سطح پر بات چیت کی اور دو طرفہ تعلقات بشمول تجارت، سرمایہ کاری، اقتصادی اور سیکورٹی تعاون کا جائزہ لیا۔ نائیڈو کا ہفتہ کو قطر پہنچنے پر دوحہ ہوائی اڈے پر ان کا رسمی استقبال کیا گیا اور انہیں گارڈ آف آنر پیش کیا گیا۔ نائب صدر 30 مئی سے 7 جون تک اپنے تین ملکی دورے کے آخری مرحلے میں عرب ملک پہنچے ہیں۔