واشنگٹن،25دسمبر(انڈیا نیرٹیو)

امریکا میں موسمِ سرما کا بدترین طوفان جاری ہے، اب تک برف باری کے باعث مختلف حادثات میں اموات کی تعداد 22 ہو گئی ہے۔بین الاقوامی میڈیا کی رپورٹ کے مطابق موسمِ سرما کے بدترین طوفان کی وجہ سے امریکہ بھر میں تقریباً ساڑھے 5 لاکھ افراد کو بجلی کی فراہمی معطل ہو گئی ہے۔

نارتھ کیرولائنا اور دیگر ریاستوں کے کچھ شہروں میں بجلی کی طلب بڑھنے پر بلیک آؤٹ ہو گیا ہے۔امریکہ کی مختلف ریاستوں میں 2800 پروازیں منسوخ جبکہ 6600 سے زائد پروازیں تاخیر کا شکار ہیں۔

اٹلانٹا، شکاگو، ڈینور، نیو یارک کے ایئر پورٹس پر مسافر پھنسے ہوئے ہیں۔رپورٹ کے مطابق برف باری سے امریکی ریاست نیویارک سب سے زیادہ متاثر ہوئی ہے، شہر بفالو میں 2 فٹ سے زائد برف پڑ چکی ہے، صورتِ حال کے پیشِ نظر بفالو کی ایری جھیل کے کنارے واقع کاؤنٹی میں نیشنل گارڈز کو تعینات کر دیا گیا ہے۔

امریکا کے وسطی اور مشرقی حصّوں میں سرد موسم کی یہ صورتِ حال ہفتے کے اختتام تک جاری رہنے کا امکان ہے۔امریکی محکمہ موسمیات کے مطابق ملک میں اگلے ہفتے سے درجہ حرارت معمول پر ا?نا شروع ہو گا۔

دوسری جانب کینیڈا کے مختلف حصّوں میں بھی شدید سرد موسم ہونے پر وارننگ جاری کر دی گئی ہے۔رپورٹ کے مطابق اونٹاریو اور کیوبیک صوبوں میں لاکھوں افراد بجلی سے محروم ہیں۔وینکوور، ٹورنٹو اور مونٹریال کے ایئر پورٹس پر سیکڑوں پروازیں منسوخ کر دی گئیں جب کہ ٹرین سروس بھی متاثر ہوئی ہے۔