روسی حملے کے ساڑھے آٹھ ماہ بعد یوکرین کے شہر کھیرسن سے روسی افواج کے انخلاء پر لوگ جشن منا رہے ہیں۔ لوگ یوکرین کا قومی ترانہ گا کر جشن منا رہے ہیں، کھیرسن میں ہر جگہ یوکرائنی پرچم لہرا رہے ہیں۔
اس سال 24 فروری کو روسی افواج نے یوکرین پر حملہ کیا۔ اس کے بعد روس نے جنوبی یوکرین کے علاقے کھیر سون پر قبضہ کر لیا۔ کھیرسن کو یوکرین کے لیے تزویراتی لحاظ سے ایک اہم شہر سمجھا جاتا ہے۔
حال ہی میں روسی وزیر دفاع سرگئی شوئیگو نے اپنی فوج کو کھیرسن کے قریب دریائے دنیپرو کے مغربی کنارے سے پیچھے ہٹنے کا حکم دیا۔ کھیر سن سے روسی افواج کے انخلاء کے بعد یوکرین کا ردِ عمل شاید معتدل ہو رہا ہو لیکن کھیرسن کے لوگ جشن کے ماحول میں نظر آ رہے ہیں۔
یوکرین کا قومی پرچم کھیرسن کے انتظامی ہیڈکوارٹر پر لہرایا گیا ہے۔ یوکرین کے جھنڈے کے ساتھ ساتھ یوکرین کی فوج کا جھنڈا بھی وہاں لہرایا گیا ہے۔ اس کے علاوہ اسپتالوں، اسکولوں، چوکوں سمیت عوامی مقامات پر لوگ یوکرین کا جھنڈا لہرا رہے ہیں۔
کھیرسن کے علاقے اسٹینسلاو کی ایک ویڈیو بھی سوشل میڈیا پر تیزی سے وائرل ہو رہی ہے۔ اس ویڈیو میں کھیرسن کے مقامی باشندے یوکرین کا پرچم لہرانے کے بعد یوکرین کا قومی ترانہ گا رہے ہیں۔ 21 سیکنڈ کے اس ویڈیو کلپ میں لوگ خوشی سے اچھل پڑے جب ایک شخص یوکرین کا جھنڈا لہراتا ہے۔ تالیاں بجتی ہیں اور پھر لوگ یوکرین کا قومی ترانہ گانا شروع کر دیتے ہیں۔
