ڈگری کالج پلوامہ میں’امرت کال کےپنچ پران’پرضلعی سطح کےیووااتسوکاانعقاد

 یووا کیندر پلوامہ نے گورنمنٹ ڈگری کالج بوائز پلوامہ کے نئے آڈیٹوریم میں امرت کال کے پنچ پران کے موضوع پر ضلعی سطح کے یووا اتسو کا انعقاد کیا۔ اس موقع پر ممبر پارلیمنٹ (ایم پی) حسنین مسعودی مہمان خصوصی تھے۔ اس پروگرام کا بنیادی مقصد یووا شکتی سے جن بھاگیداری کے جذبے کے تحت آزادی کا امرت مہوتسو منانا اور ماہرین کی سرپرستی میں ضلع کے نوجوان فن کاروں، مصنفین، فوٹوگرافروں اور خطیبوں کی ایک برادری بنانا تھا۔

 اسی طرح کے پروگرام ضلع بھر میں منعقد کیے جا رہے ہیں۔ اس موقع پر خطاب کرتے ہوئے ممبر پارلیمنٹ نے کہا کہ اتسو نوجوانوں کے لیے ٹیلنٹ ہنٹ کے مختلف پروگراموں میں حصہ لینے اور اپنی متنوع صلاحیتوں کو ظاہر کرنے کا ایک موقع ہے۔ انہوں نے کہا کہ یو ٹی  کھیلوں اور نوجوانوں کی ترقی سمیت کئی شعبوں میں ترقی کی بلندیوں کی طرف گامزن ہے۔

 انہوں نے کہا کہ یووا اتسو آزادی کا امرت مہوتسو کے بینر تلے یووا طاقت کو پہچاننے اور اس کی قدر کرنے کے جذبے کے تحت منایا جا رہا ہے۔ انہوں نے طالبات کی روز مرہ کی سرگرمیوں اور زندگی کے ہر شعبے میں بہترین کارکردگی کے لیے ان کی تعریف کی۔